पोखरा । नेपाली काँग्रेस कास्कीले जिल्लामा पार्टीको एक सयदिने विशेष अभियानका लागि प्रतिनिधि खटाएको छ । कास्की काँग्रेसले कास्कीका ७२ वटा इकाइमा संयोजक सहित प्रतिनिधि खटाएको सहसचिव एवं प्रवक्ता नवीन सिग्देलले बताए ।

उनका अनुसार अभियानका क्रममा गर्नुपर्ने कामबारे सोमबार कार्यक्रम गरी अभिमुखीकरण भयो । कार्यक्रममा पार्टीका केन्द्रीय सदस्य एवं अभियानका कास्की प्रतिनिधि गोविन्द भट्टराईले पार्टी विचार र सिद्धान्तले चल्ने बताए । काँग्रेसले मात्र देश र जनताको हितमा काम गर्ने उनको भनाइ छ ।

कास्की काँग्रेसले जिल्ला कार्यसमिति, महासमिति सदस्य, महाधिवेशन प्रतिनिधि, क्षेत्र, प्रदेश, महानगर पालिका र गाउँ पालिका सभापतिहरुको संयुक्त बैठक बसेर सुझाव संकलन गरी प्रतिनिधि खटाएको हो ।

वडामा पुगेका प्रतिनिधिहरुले विभिन्न १० वटा बुँदामा छलफल गरी पार्टीलाई प्रतिवेदन बुझाउनुपर्ने कास्की काँग्रेसका सभापति किशोरदत्त बरालले बताए ।

उनले भने, ‘अभियान प्रभावकारी रुपमा संचालन हुन्छ । अभियानले पार्टी सशक्त बनाउन ठूलो सहयोग गर्ने छ ।’