लेखनाथ । २५ औं आदर्श कप फुटबल प्रतियोगितामा कास्की जिल्ला फुटबल संघ सेमिफाइनल प्रवेश गरेको छ ।

सोमबार स्याङ्जा जिल्ला फुटबल संघलाई २–० गोलले पराजित गर्दै अघिल्लो चरणमा प्रवेश गर्न सफल भएको हो । जितका लागि मुकुन्द निउरे र अनीष तामाङले गोलको योगदान दिए ।

आदर्श युवा क्लबको आयोजनामा भएको प्रतियोगिताअन्तर्गत सोमबार पहिलो हाफको अन्तिम समयमा कास्की–११ का मुकुन्द निउरेले पहिलो गोल गर्दै टिमलाई अग्रता दिलाएका थिए । खेलको ७६ औं मिनेटमा पुन कास्कीकै अनीसले गोल थप्दै टोलिको जित सुनिश्चित गरेका हुन् । अब कास्की टिमले आयोजक आदर्श युवा क्लबसँग सेमिफाइनलमा प्रतिष्पर्धा गर्नेछ । प्रतियोगितामा कास्की जिल्ला फुटबल संघ कास्कीका अनीष तामाङ म्यान अफ दि म्याच भए । उनले नगद ५ हजार पुरस्कार प्राप्त गरेका छन् ।

मंगलबार क्वाटरफाइनल चरणको अन्तिम खेल हुँदैछ । जसमा नेपाल प्रहरी र एन्फा गोरखाका बीच प्रतिस्पर्धा हुने आयोजक संस्था आदर्श युवा क्लबका अध्यक्ष पदम गुरुङले जानकारी दिए ।

२२–२९ मंसिरसम्म चल्ने प्रतियोगिताको विजेता टिमले नगद ४ लाख २५ हजार पाँच सय २५ रुपैयाँ शिल्ड, मेडल र प्रमाणपत्र प्राप्त गर्नेछ । उपविजेताले २ लाख २५ हजार पाँच सय २५ रुपैया शिल्ड, मेडल र प्रमाणपत्र प्राप्त गर्नेछ ।

विधागततर्फ सर्वाेत्कृष्ट हुने खेलाडीलाई २५ हजार, ट्रफी, मेडल तथा प्रमाणपत्र प्रदान गरिनेछ । यस्तै उत्कृष्ट प्लेमेकर, सर्वाधिक गोलकर्ता, उत्कृष्ट डिफेन्डर, उत्कृष्ट गोलरक्षक, उत्कृष्ट कोचलाई जनही १५ हजारसहित ट्रफी, मेडल तथा प्रमाणपत्रद्वारा पुरस्कृत गरिनेछ । प्रतियोगिताको मुख्य प्रायोजक शौर्य सिमेन्ट रहेको छ ।