पोखरा । सहकारी ठगी मुद्दामा अनुसन्धानका लागि कास्की प्रहरी हिरासतमा रहेका पूर्व गृहमन्त्री एवं राष्ट्रिय स्वतन्त्र पार्टीका सभापति रवि लामिछानेलाई सोमबार वीरगञ्ज लगिएको छ ।

उनलाई पोखरा अन्तर्राष्ट्रिय विमानस्थलबाट बुद्ध एयरमार्फत काठमाडौं हुँदै सिमरा विमानस्थल उतारिएको थियो । त्यसपछि गाडीमार्फत वीरगञ्ज लगिएको हो ।

वीरगञ्जको सानोपाइला सहकारीको रकम समेत गोर्खा मिडियामा लगेर अपचलन गरेको अभियोगमा उनलाई बयानका लागि त्यसतर्फ लगिउको हो । गत सातामात्र उनलाई काठमाडौंको स्वर्णलक्ष्मी र चिवतनस्थित सहारा सहकारीको मुद्दामा बयान गराएर पोखरा फर्काइएको थियो । बिहीबार बिहान चितवनबाट रातारात पोखरा ल्याइएकोमा मानवअधिकार हनन भएको भन्दै सर्वत्र आलोचनासमेत भएको छ ।

गत २ कात्तिकमा काठमाडांैबाट पक्राउ गरी पोखरा ल्याइएका लामिछानेलाई सहकारी ठगी, संगठित अपराध र सम्पत्ति शुद्धीकरण मुद्दामा अनुसन्धान भइरहेको छ । उनलाई पटकपटक म्याद थप गरी कास्की प्रहरी रिहासतमा राखिएको छ । छैटौंपल्ट आइतबार उनलाई कास्की जिल्ला अदालतमा म्याद थपका लागि लगिएकोमा न्यायाधीश हिमलाल बेल्बासेको इजलासले ४ दिनको म्याद थप गरेको छ ।

कास्की हिरासतमै रहेको बखत लामिछानेलाई बुटवलको सुप्रिम सहकारीको रकम अपचलन मुद्दामा बयानका लागि रुपन्देही लगेर फर्काइएको थियो ।

यसैबीच, गोर्खा मिडिया नेटवर्कका अर्का सञ्चालक पूर्व डिआईजी छविलाल जोशीलाई भने पोखराबाट स्थलमार्ग हुँदै वीरगञ्ज पु¥याइएको थियो ।