पोखरा । नेपाली जनप्रगतिशिल मञ्च जापानले शनिबार पोखरा–२५, हेमजामा निःशुल्क स्वास्थ्य शिविर गरेको छ ।

किरण गुरुङ मेडिकल र आरसी हेल्थ क्लिनिकको प्राविधिक सहयोगमा सुगर, मृगौला तथा महिलासँग सम्बन्धित विभिन्न रोगहरुको परीक्षण गरिएको थियो । सो अवसरमा विशेषज्ञ डाक्टरहरुको उपस्थितिमा स्वास्थ्य परामर्श सेवा समेत प्रदान गरिएको छ । शिविरबाट विशेषगरी हेमजा साथै छिमेकी गाउँपालिकाका गरी २ सयभन्दा बढी नागरिकले प्रत्यक्ष स्वास्थ्यलाभ लिए ।

पोखरा २५ का अध्यक्ष मोतिलाल तिम्सिनाले रोग लुकाउन नहुने बताए । उनले समय समयमा स्वास्थ्य परीक्षण नगर्दा जटिल दीर्घ रोग लाग्न सक्ने भन्दै सचेत गराए । तिम्सिनाले वडाले गत वर्षदेखि सञ्चालन गरेको वडा नागरिक आरोग्य कार्यक्रम निकै प्रभावकारी भएको हुँदा यस वर्ष पनि निरन्तरता दिने उल्लेख गरे ।

गोरीशंकर माविमा गौरीशंकर आमा समूहको सहजीकरणमा भएकोे कार्यक्रमको अध्यक्षता जनप्रगतिशील मञ्चका अध्यक्ष मोहन पौडेलले गरेका थिए । स्वागत गौरीशंकर आमा समूहका अध्यक्ष उमा भूर्तेल पौडेल र संचालन आमा समूह उपाध्यक्ष लक्ष्मी आर्चाय पौडेलले गरेका थिए ।