लेखनाथ । आदर्श युवा क्लबको आयोजनामा शनिबारदेखि २५ औं आदर्श कप फुटबल प्रतियोगिता सुरु भएको छ । २२–२९ मंसिरसम्म लेखनाथ भण्डारढिक रंगशालामा चल्ने प्रतियोगितामा गण्डकीका ८ टिमले भाग लिएका छन् ।

प्रतियोगिताको उद्घाटन गर्दै गण्डकी प्रदेशका मुख्यमन्त्री सुरेन्द्रराज पाण्डेले खेल पर्यटनको माध्यमबाट गण्डकी प्रदेशको विकास गर्ने प्रदेश सरकारको लक्ष्य रहेको बताए । पाण्डेले खेल क्षेत्र र खेलाडीको विकासका लागि प्रदेश सरकार गम्भीर रहेको बताउँदै खेल क्षेत्रको विकासका लागि सरकारले विभिन्न कार्यक्रम गरिरहेको यहाँको कभर्ड हल र रंगशालाको स्तरोन्नतिमा प्रदेश सरकारले केही न केही सहयोग गर्ने बताए ।

नले पोखरालाई पर्यटकीय राजधानी घोषणा गरिएको अवस्थामा अन्य क्षेत्रको साथसाथै खेल पर्यटनको माध्यमबाट पनि प्रदेशलाई राष्ट्रिय र अन्तर्राष्ट्रिय रुपमा चिनाउन चाहेको बताउँदै प्रदेशभित्रका खेलकुद एवं पर्यटकीय पूर्वाधारहरु निर्माणमा प्रदेश सरकार लागिरहेको बताए । प्रदेश सरकारले मुस्ताङमा हाई अल्टिच्युड खेल मैदान निर्माण गरी संसारभरका खेलाडीहरुलाई ल्याएर खेलाउने योजना समेत सुनाए । ओलम्पिकमा सहभागी खेलाडीको अनुभव आदानप्रदानका लागि गण्डकी प्रदेश सरकारले गत वर्षदेखि ‘स्कुल टु ओलम्पियन’ कार्यक्रम गरिरहेको र प्रदेशबाट ओलम्पिकमा सहभागी खेलाडीहरूलाई आर्थिक सहयोग पनि गरिरहेको उनले जानकारी दिएका थिए ।

पोखरा २९ का वडाध्यक्ष श्रीप्रसाद गुरुङले आर्थिक अभावका कारण रंगशाला निर्माणले पूर्णता नपाएको गुनासो गरे ।

‘निरन्तरता हाम्रो प्रतिबद्धता, फुटबल विकास हाम्रो दृढता’ भन्ने मूल नाराका साथ आयोजित प्रतियोगिताको उद्घाटनमा आयोजक विजयी भएको छ । एन्फा तनहुँलाई १–० गोलअन्तरले पराजित गर्दै सेमिफाइनल पुगेको हो । ४१ औं मिनेटमा आदर्शका सजिन मगरले डि एरियाबाट गरेको प्रहार गोलमा परिणत भएको थियो । निर्धारित ९० मिनेटको खेलमा थप गोल नभएपछि निर्णायक बनेको हो । म्यान अफ दी म्याच सजिन मगर घोषित भए ।

आइतबार नेपाल आर्मी सिद्धि दल गण र सशस्त्र प्रहरी बल गण्डकी मुख्यालयबीच प्रतिस्पर्धा हुनेछ ।

विजेताले ४ लाख २५ हजार ५२५ रुपैयाँ र उपविजेताले २ लाख २५ हजार ५२५ रुपैयाँ साथमा सिल्ड, मेडल र प्रमाणपत्र प्राप्त गर्ने छन् । साथै विधागत पुरस्कार पनि व्यवस्था गरिएको अध्यक्ष पदम गुरुङले बताए । ६ वर्षपछि पुनः सञ्चालित प्रतियोगितामा विधागततर्फ सर्वाेत्कृष्ट हुने खेलाडीलाई नगद २५ हजार, ट्रफी, मेडल तथा प्रमाणपत्र प्रदान गरिनेछ । यस्तै उत्कृष्ट प्लेमेकर, सर्वाधिक गोलकर्ता, उत्कृष्ट डिफेन्डर, उत्कृष्ट गोलरक्षक, उत्कृष्ट प्रशिक्षकलाई जनही १५ हजार दिइनेछ । हरेक खेलका म्यान अफ द म्याचलाई ५ हजार रुपैयाँ दरले पुरस्कृत गरिनेछ ।

प्रतियोगिताका लागि पोखरा वडा २९ कार्यालयले संरक्षकत्व प्रदान गर्दै खेलमैदान मर्मत सम्भारमा सहयोग गरेको छ ।