पोखरा । शिक्षा, विज्ञान तथा प्रविधि मन्त्री विद्या भट्टराईले पर्यटकीय विकासको सम्झावना उजागर गर्न प्रतिवद्ध रहेको बताएकी छन् ।

पोखरा १५, ढुंगेसाँघु, पट्नेरीमा जारी कोटिहोममा बिहीबार उपस्थित मन्त्री भट्टराईले पट्नेरीको विकासमा जनतासँगसँगै रहेको बताइन् । उनले भनिन्, ‘यहाँहरुले दुईपटक निर्वाचित गराइसक्नुभएको छ, म यहाहरुसँगै छु । यहाँहरु सबैको मायार सद्भावले अगाडि बढिरहेको छु ।’ उनले सेती नदीमाथि गुफामा जानका लागि आवश्यक संरचना बनाउन गरिएकोमा मागमा आफूले सहयोग गर्ने प्रतिबद्धता जनाइन् ।

सो क्षेत्रको विकासका लागि स्थानीयले तयार गरेको परियोजनालाई बजेटको व्यवस्था गर्न सम्बन्धित मन्त्रालयमा पहल गर्ने उनले आश्वासन दिइन् ।

कोटिहोमका संकल्पकर्ता शोभाकान्त ढकाल (कृपालु दास) ले यस क्षेत्रलाई धार्मिक पर्यटकीय स्थान बनाउन सकिने अथाह सम्भावना रहेको जानकारी गराए । सरकारीस्तरबाट बजेटको व्यवस्था गर्न सके ढुङगेसाँघु, पट्नेरी सेती नदि माथी रहेको गुफामा पर्यटक जानको लागि आवश्यक संरचना बनाउने सोच सुनाए । २ करोड रुपैयाँ लगानी गर्न सके यस क्षेत्रमा सयौँ पर्यटक आउने र पर्याप्त आम्दानी समेत गर्न सकिने सम्भावना रहेको उनले जानकारी गराए ।

धाममा १०८ शिवलिङग, १०८ गौमुखी धारा, सेती नदीसम्म स्थानका लागि पुग्न १०८ सिँढी, जेष्ठनागरिक मिलन केन्द्र स्थापना गर्ने उदेश्यका साथ कोटिहोमको आयोजना गरिएको संकल्पकर्ता ढकालले मन्त्री भट्टराईलाई अवगत गराएका थिए । कोटिहोम–२०८१ प्रमुख वाचक शोभाकान्त ढकाल, दिग्र्शनवाचक शिरोमणि दीपक सापकोटा, भागवत्मन्जरी पुज्य राधाकिशोरी दासीलेलगायतले कथा बाचन गर्नुका साथै हरेक दिन आमन्त्रित कथावाचकले कथावाचन गर्ने यज्ञका संयोजक नारायण भण्डारीले जानकारी दिए ।

अन्नपूर्णेश्वर शिवालय शिवशक्ति धाम तथा बृहत्तर धार्मिक क्षेत्र विकास समितिले आयोजना गरेको कोटिहोम २७ मंसिरसम्म चल्नेछ ।