पोखरा । पोखरा–९, शिवटोल बसपार्कस्थित सहारा बाल आधारभूत विद्यालयमा आधुनिक प्रविधिसहितको तातो–चिसो पानीको सुविधासहितको धारा सहयोग गरिएको छ ।

पोखरा ९ का समाजसेवी अमर गुरुङ र अर्जुन मैनालीको संयुक्त पहलमा युभी प्रविधिको सो धारा विद्यालयलाई हस्तान्तरण गरिएको थियो ।

पोखरा महानगरपालिका कार्यालय शिक्षा महाशाखाका प्रमुख हेमप्रसाद आचार्यले सरकारले निःशुल्क शिक्षाको अवधारणा ल्याए पनि कार्यान्वयनमा चुकेको धरणा राखे । पोखरा ९ का वडाध्यक्ष दीपेन्द्र मर्सानीले विद्यालयको उत्तरदायित्व वडाले वहन गर्ने प्रतिबद्धता व्यक्त गरे ।

सिद्धि–सेतुली प्रतिष्ठान कास्कीका अध्यक्ष पत्रकार दीपेन्द्र श्रेष्ठले दातालाई धन्यवाद दिँदै विद्यालयलाई स्थापित गराउन विद्यार्थी, शिक्षक र संरचना मात्र नभई आफ्नै जग्गा हुनुपर्नेमा जनप्रतिनिधि र प्रमुख अतिथिको ध्यानाकर्षण गराउँदै बसपार्क व्यवस्थापनपश्चात विद्यालयको भविष्य कतातर्फ जाला भन्नेबारेमा चासो व्यक्त गरेका थिए ।

विद्यालयका व्यवस्थापन समिति अध्यक्ष विक्रम थकालीले विपन्न तथा अव्यवस्थित वस्तीका करिब २ सय ६० जना अध्ययनरत् विद्यार्थीलक्षित गरी सहयोग गरेकामा दाताद्वय अमर गुरुङ र अर्जुन मैनालीप्रति आभार व्यक्त गरे । उनले आगामी दिनमा पनि सहयोगी मनको चासो र सक्रियताले विद्यालयको भौतिक र शैक्षिक गुणस्तरमा फड्को मार्न सकिने विश्‍वास व्यक्त गरे ।

प्रधानाध्यापक लोचना अधिकारीले कुल ३ ओटा धाराहरुमार्फत विद्यार्थीहरुले सुविधा लिन सक्ने धाराहरु बनाई पूनीत कार्य गरेकोमा आभार व्यक्त गरिन् ।

विद्यालय व्यवस्थापन समिति अध्यक्ष थकालीको अध्यक्षतामा भएको कार्यक्रमको संचालन शिक्षक सुदीप कोइरालाले गरेका थिए ।