पोखरा । गण्डकी विश्वविद्यालयको आयोजनामा पोखरामा दोस्रो संस्करणको कुलपति रनिङ शिल्ड फुटबल प्रतियोगिता हुने भएको छ ।

यही २९ मंसिरदेखि ३ पुससम्म पोखरा रंगशालामा उक्त प्रतियोगिता हुन लागेको प्रतियोगिता संयोजक डा. मधुसुधन सुवेदीले जानकारी दिए । उनका अनुसार प्रतियोगितामा गण्डकीका माध्यमिक तह विद्यालयले भाग लिन सक्ने छन् । सोमबारदेखि टिम दर्ता सुरु भएको छ ।

गण्डकी विश्वविद्यालय नेपालमै पहिलोपटक प्रदेश सरकारद्वारा स्थापित विश्वविद्यालय हो । यहाँ स्नातक तहमा खेलकुद व्यवस्थापन विषयसमेत पढाइ हुन्छ । नेपाली महिला भलिबल टिम कप्तान अरुणा शाही समेत यही अध्ययनरत् छन् । यसबाहेक विश्वविद्यालयले विभिन्न खेलकुदका कार्यक्रम समेत सञ्चालन गर्दै आएको जनाएको छ ।

२०७७ सालमा स्थापित यो विश्वविद्यालयले २ वर्षअघि प्रथम कुलपति रनिङ शिल्ड आयोजना गरेकोमा कालिका माविले उपाधि जितेको थियो ।

यसपालि विजेताले १ लाख र उपविजेताले ५० हजार रुपैयाँसहित साथमा ट्रफी, मेडल र प्रमाणपत्र प्राप्त गर्नेछन् । प्लेयर अफ द टुर्नामेन्टलाई १५ हजारसहित ट्रफी प्रदान गरिनेछ ।

खेलकुद व्यवस्थापन संकाय संयोजक सुवेदीले फुटबल प्रतियोगिताले स्नातक तहको खेलकुद व्यवस्थापनको समग्र विकास र उत्थानमा समेत टेवा पुग्ने अपेक्षा गरे ।

प्रतियोगिताका सम्पूर्ण खेल नकआउट चरणमा खेलाइनेछ ।