पोखरा । अन्नपूर्णेश्वर शिवालय शिवशक्ति धाम तथा बृहत्तर धार्मिक क्षेत्र विकास समितिको आयोजनामा पोखरा–१५ ढुंगेसाँघु, पट्नेरीमा सोमबारदेखि ऐतिहासिक शुक्लागण्डकी कोटिहोम हुँदैछ । १७–२७ मंसिरसम्म चल्ने कोटिहोमको गण्डकी प्रदेशका प्रदेश प्रमुख डिल्लीराज भट्टले उद्घाटन गर्ने कार्यक्रम छ ।

कोटिहोमस्थलमा आवश्यक भौतिक संरचना निर्माण गरी भव्य रुपमा सजावट गरिएको छ । उद्घाटन पूर्व पोखरा वडा १५ कार्यालयबाट बिहान १० बजे कलश यात्रा सुरु हुने धामका अध्यक्ष मदन गिरीले बताए । वडा कार्यालय अगाडिबाट सुरु हुने कलशयात्रा राधोराधे मन्दिर, रामबजार, घलेचोक, टुटुंगा, नयाँगाउँ, वन क्याम्पस, किन्तपुरचोक, ढुंगेसाँघु चोकहँुदै पट्नेरी धाममा पुग्नेछ ।

कोटिहोमका प्रमुखवाचक धामका संरक्षक एवं यज्ञ संकल्पकर्ता शोभाकान्त ढकाल हुन् । कोटिहोममा १५ भन्दा बढी वाचकलाई निम्ता दिएको जनाएको छ ।

धाममा १०८ शिवलिंग, १०८ गौमुखी धारा, सेती नदीसम्म स्थानका लागि पुग्न १०८ सिंढी, ज्येष्ठ नागरिक मिलन केन्द्र स्थापना गर्ने उद्देश्यका साथ गण्डकीमै पहिलोपल्ट कोटिहोम आयोजना गरिएको समिति उपाध्यक्ष राजकुमार बरालले जानकारी दिए ।