पोखरा।पोखरामा आयोजित छैटौं गण्डकी प्रदेशस्तरीय विज्ञान हाजिरीजवाफ प्रतियोगितामा न्यू मोडल माध्यमिक विद्यालयको टिम प्रथम भएको छ । सोही विद्यालयको अर्को टिम दोस्रो भयो ।

विज्ञान शिक्षक समाज नेपाल (स्टान) कास्कीको आयोजनामा भएको प्रतियोगितामा पोखरा ८, नागढुंगास्थित न्यू मोडल गत वर्ष पनि च्याम्पियन बनेको थियो । अनिज पोखरेल र सुरज जैसवालको टिम यसपालि प्रथम भएको हाे । प्रथमले १५ हजार, ट्रफी र प्रमाणपत्र जितेको छ ।

साईमोन क्षेत्री र ओजस्वी पाैडेलको टिम दोस्रो हुँदै १० हजार साथमा ट्रफी र प्रमाणपत्र पुरस्कार पायो ।

डायमण्ड मावि, पोखरा तेस्रो भयो । उसले ८ हजार साथमा ट्रफी र प्रमाणपत्र पुरस्कार प्राप्त गरेको छ । मदरल्याण्ड मावि ए, मदरल्याण्ड मावि बि, एसओएस हर्मन माइनर विद्यालय सान्त्वना हुँदै समान ४ हजार पुरस्कार प्राप्त गरेका छन् ।

मदरल्याण्ड माध्यमिक विद्यालयको प्रायोजनमा गत १४ र १५ गते भएको प्रतियोगिताको गण्डकी प्रदेशका सामाजिक विकास, शिक्षा तथा खेलकुद मन्त्री बिन्दुकुमार थापा र गण्डकी विश्वविद्यालयका डिन डा. कपिल उपाध्यायले संयुक्त उद्घाटन गरेका थिए । समापनमा प्रमुख अतिथि पृथ्वीनारायण क्याम्पसका सहायक क्याम्पस प्रमुख मीनराज लम्साल थिए ।
स्टान कास्की अध्यक्ष शान्तराम लामिछानेको अध्यक्षतामा भएको समापनमा स्टान गण्डकी अध्यक्ष राजकुमार ढकाल, सचिव सुजन लम्साल, मदरल्याण्ड माविका प्राचार्य डा. नारायण बराललगायतले शुभकामना मन्तव्य व्यक्त गरेका थिए ।

प्रतियाेगितामा १ सय ४ विद्यालयले लिएका थिए ।