लेखनाथ । लेखनाथ निर्माण व्यवसायी समितिको आयोजनामा भवन निर्माण आचारसंहितासम्बन्धी प्रशिक्षण शनिबार सम्पन्न भयो ।

प्रशिक्षण उद्घाटन गर्दै लेखनाथ निर्माण व्यवसायी समितिका संस्थापक अध्यक्ष किसानसिं गुरुङले भूकम्पपछि परिवर्तित अवस्थामा नयाँ बन्ने भवन तथा अन्य पूर्वाधारलाई भूकम्प प्रतिरोधी बनाउन सरकारले देशभर आचारसंहिता लागु गरेको बताए । उनले विनाशकारी भूकम्पमा ध्वस्त भएका घर तथा संरचना भूकम्पप्रतिरोधी नभएकाले ठूलो क्षति भएको भन्दै सरकारले आचारसंहितालाई कडाइसाथ लागु गर्ने सरकारको लक्ष्य रहेको र यसलाई निर्माण व्यवसायीहरुको पनि लक्ष्य मानेर संस्थामा आबद्व ३ सय ३६ सदस्यलाई समेटेर अगाडि वढ्न अनुरोध गरे ।

इ.अनिल ढुंगानाले भवन निर्माण, माटो परीक्षण, कुलो, नहर, पानीट्यांकी, बाटो, खोला, तालतलैयालगायतको पछिल्लो पटक लागु भएका आचारसंहिताको विषयमा प्रशिक्षित गराएका थिए । २०७२ को भूकम्प, गएका २५ वर्षमा विश्वका विभिन्न देशमा गएका भूकम्प, विभिन्न मुलुकमा प्रचलित भवनसंहिता तथा यस सम्बन्धमा गरिएका विभिन्न नयाँ अनुसन्धान, प्रविधि र ज्ञानको विकासका आधारमा भूकम्पप्रतिरोधी सुरक्षित भवन निर्माण गर्न भवनसंहिता अद्यावधिक गरिएको बताउँदै संहिताले स्थापित इन्जिनियरिङ मान्यता र सिद्धान्तअनुरूप भूकम्पप्रतिरोधी भवनको विश्लेषण र डिजाइन विधिलाई मार्गदर्शन गर्ने बताए ।

सामाजिक सुरक्षा कोष गण्डकी प्रदेशका लेखा अधिकृत रमेश ढुंगेलले योगदानमा आधारित सामाजिक सुरक्षा कार्यक्रमको विषयमा जानकारी गराए ।

निर्माण व्यवसायी समितिका अध्यक्ष भीमबहादुर नेपालीले नयाँ समिति निर्वाचित भएको सय दिन पूरा गरेको अवस्थामा अधिवेशनको समयमा गरिएका अधिकांश प्रतिबद्धतालाई कार्यान्वयनको चरणमा लगिएको बताए ।

निवर्तमान अध्यक्ष प्रेम थापाले अग्रजले सुरुआत गरेका योजना पूर्णता दिँदै सम्पूर्ण व्यवसायीहरुको हितमा अघि बढ्ने कोशिसमा रहेको बताए । पूर्व अध्यक्ष रामबहादुर गुरुङले निर्माण व्यवसायीले भवन निर्माण गर्दा व्यावहारिक, जीवनोपयोगी एवं संहिताबमोजिमको होओस् भन्ने उद्देश्यले प्रशिक्षणको आयोजना गरिएको बताए ।

संस्थाका अध्यक्ष भीमबहादुर नेपालीको अध्यक्षतामा भएको कार्यक्रममा स्वागत वरिष्ठ उपाध्यक्ष जीवनकुमार परियार र सञ्चालन सचिव बुद्धराज बस्यालले गरेका थिए ।