पोखरा । चर्चित टिकटकर एवं समाजसेवी गिभिना मगरमाथि बज्रचोट परेको छ । उनले आमा र भाइलाई एकैपटक गुमाएकी छन् । अनपेक्षित यी शृङ्लाबद्ध अप्रिय खबरले २७ वर्षीया गिभिनालाई कमजोर बनाएको छ ।

शुक्रबार साँझ पोखरा–२५, हेमजामा जेब्राक्रसबाट सडक पार गर्दै गर्दा ५५ वर्षीया आमा धनकुमारी बुढामगरलाई ट्रकले ठक्कर दिएको हो । पति गणेशसँगै उनी घान्द्रुकबाट फर्किने क्रममा थिइन् । ठक्करबाट घाइते उनलाई ततकालै अस्पताल लगिए पनि चिकित्सकले मृत घोषणा गरेको प्रहरीले जनायो । पतिलाई केही भएको छैन ।

पोखरा–बागलुङ राजमार्गअन्तर्गत हेमजा याम्दीको क्रान्तिटोलमा शुक्रबार साँझ साढे ७ बजे उक्त दुर्घटना भएको हो । जिल्ला प्रहरी कार्यालय कास्कीले ग२ख १४६० नम्बरको ट्रक र ट्रक चालक पाँचथरको फाल्गुनन्द गाउँपालिका ३ स्थायी घर भइ हाल पोखराको बगर बस्ने ट्रकचालक ४५ वर्षीय पृथ्वीप्रसाद तामाङलाई नियन्त्रणमा लिएर अनुसन्धान गरिरहेको जनाएको छ ।

गिभिना परिवारकी जेठी छोरी हुन् । उनका दुई जना भाइ हुन् । आमाको सडक दुर्घटनामा मृत्युपछि सहन नसकी उनका कान्छा भाइले झुण्डिएर आत्महत्या गरेका हुन् । शनिबार बिहान उनी झुण्डिएको अवस्थामा फेला परेको वडाध्यक्ष मोतीलाल तिम्सिनाले बताए ।

दीनदुःखीको सेवामा सधैँ लागिपर्ने गिभिना केही वर्षयता टिकटक मार्फत चर्चित छन् । उनका लाखौं फ्यान छन् । सानैदेखि सामाजिक कार्यमा रुची राख्ने गिभिनाले गत सातामात्र धरानका किरण लिम्बुसँग लगनगाँठो कसेकी थिइन् ।