पोखरा । नेपाली काँग्रेस कास्कीको प्रवक्तामा नवीन सिग्देल मनोनीत भएका छन् ।

नेपाली काँग्रेस कास्कीका सभापति किशोरदत्त बरालले पार्टीका सहसचिवसमेत रहेका सिग्देललाई बिहीबार प्रवक्ता मनोनीत गरेका हुन् ।

नेपाली काँग्रेसको नियमावली २०७६ को परिच्छेद १८ को धारा ६३ बमोजिम सिग्देललाई प्रवक्ता मनोनयन गरिएको पत्रमा उल्लेख छ । नियुक्त गरेसँगै सभापति बरालले काँग्रेसको सार्वभौम अधिकारको रक्षाको निम्ति पार्टीको नीति, सिद्वान्त र कार्यक्रमलाई सफलताको बाटोमा अग्रसर तुल्याउन विगतमा झैं सदैव क्रियाशील, रचनात्मक सहयोगको आशा र विश्वास व्यक्त गरे ।

सिग्देल कास्कीको १४आंै जिल्ला अधिवेशनबाट सहसचिवमा निर्वाचित भएका थिए । १३ औं अधिवेशनबाट सदस्य निर्वाचित उनले अघिल्लो कार्यकाल पनि ३ वर्षभन्दा बढी समय प्रवक्ताको भूमिका निर्वाह गरेका थिए ।

विद्यार्थी राजनीति हुँदै पत्रकारितामा पहिचान बनाएका सिग्देल नेपाल विद्यार्थी संघ कास्कीको पूर्व सभापति र नेपाल प्रेस युनियन, कास्कीको निवर्तमान अध्यक्ष हुन् । उनी आदर्श समाजको पूर्व कार्यकारी सम्पादकसमेत हुन् ।

उनले देश र जनतालाई शिरमा राखेर निष्ठा, त्याग, आदर्श, सिद्वान्त डगमगाउन नदिने प्रतिबद्धता जनाए ।