पोखरा । उच्च शिक्षालय तथा माध्यमिक विद्यालय संघ नेपाल (हिसान) कास्कीको १७ औं हिसान कास्की स्पोर्टस मिट–२०८१ शुक्रबार समापन हुँदैछ । गत ११ मंसिरदेखि चलेको प्रतियोगिताको समापनमा विजयीलाई पुरस्कृतसमेत गरिनेछ ।

बिहिबार प्लस टु (कक्षा ११–१२) छात्रा–छात्रा र विश्वविद्यालय विङतर्फका ब्याडमिन्टनका सम्पूर्ण खेलहरु सम्पन्न भए । जसमा मदरल्याण्ड च्याम्पियन भयो । समग्रमा मदरल्याण्डले माविले ७ अंक प्राप्त गर्दा प्रतिभा मावि दोस्रो हुँदै ५ र कास्की मोर्डनाइज्ड तेस्रो हुँदै ३ अङ्क हात पारेको ब्याडमिन्टनका संयोजक पुरन कुँवरले जानकारी दिए ।

विश्वविद्यालय विङतर्फ पोखरा लिंकन इन्टरनेशनल कलेज ७ अंका साथ पहिलो बन्दा पोखरा इन्जिनियरिङ कलेज ५ अंकका साथ दोस्रो, इन्फर्मेटिक्स र पोखरा कलेज अफ म्यानेजमेन्ट ३–३ अंकका साथ तेस्रो स्थान प्राप्त गरे ।

छात्र प्लस टु सिंगल्समा प्रतिभाका विज्ञान भण्डारीले मदरल्याण्डका दीप रानालाई २–१ को सेटमा पराजित गर्दा छात्रा सिंगल्समा केएमएकी प्रजु थापाले मदरल्याण्डकी विशिष्ट केसीलाई २१–१६, २१–११ ले पाखा लगाइन् ।

छात्र सिंगल्समा मदरल्याण्डका पृथक गुरुङ र प्रतिभाका सुमित सुनार र छात्रातर्फ सगरमाथाकी सदीक्षा खत्री र ग्लोबलकी प्रश्मिता खाँडले तेस्रो स्थान हात पारे ।

प्लस टु छात्र डबल्समा प्रतिभाका विज्ञान भण्डारी र सुमित सुनारको जोडीले मदरल्याण्डका दीप राना र पृथक रानाको जोडीलाई २२–२०, २१–१७ ले पराजित गरे । छात्रातर्फ केएमएका प्रजु थापा र आइशा संग्रौलाको जोडीले मदरल्याण्डका विशिष्ट केसी र उपसना पौडेललाई २१–१५, १६–२१ र २१–७ ले पराजित गरे ।

छात्र डबल्समा सगरमाथाका समिर र सुमन अधिकारीको जोडी रेन्वोका आइशा राना र किस्मत गुरुङको जोडी तथा छात्रातर्फ ज्योतीकुञ्जका सज्जा घले र आयुप्सा गुरुङको जोडी र ग्लोबलका शइन थापा मगर र प्राप्ती खड्काको जोडीले तेस्रो स्थान हात पारे ।

विजयीलाई प्रदेश खेलकुद परिषद् गण्डकीका उपाध्यक्ष धोजकुमार गुरुङ, हिसानका केन्द्रीय उपाध्यक्ष बाबुराम पन्त, हिसान कास्की अध्यक्ष दिवाकर जैशीलगायतले मेडल तथा प्रमाणपत्र वितरण गरेका थिए ।

यस्तै, छात्र भलिबलमा प्रतिभा मावि र गुरुकुल मावि, सिर्जना र न्यू ग्यालेक्सी सेमीफाइनल प्रवेश गरे । छात्रा भलिबलतर्फ सिर्जना र सगरमाथा तथा करुणनिधि मावि र गुरुकुल मावि सेमिफाइनलमा भिड्ने छन् ।

बास्केटबलमा प्रतिभा मावि र मनकामना तथा न्यू ग्यालेक्सी र कास्की मोर्डनाइज्ड अन्तिम चारमा प्रवेश गरे । क्वार्टरफाइनलमा प्रतिभाले ग्लोबललाई ५२–२५, मनकामनाले सोसल पब्लिकलाई ३६–१५, कास्की मोर्डनाइज्डले माउन्ट अन्नपूर्णलाई ५०–४० र न्यू ग्यालेक्सीले मेरीगोल्डलाई ४८–२१ ले पराजित गरेको बास्केटबलका संयोजक खिमबहादुर गुरुङले जानकारी दिए ।

स्पोर्टस मिटमा प्लस टु, कलेज र विश्वविद्यालयतर्फका खेलाडीहरु विभिन्न चार खेल बास्केटबल, भलिबल, व्याडमिन्टन र टेबुल टेनिसका प्रतिष्पर्धामा प्रतिस्पर्धा जारी छ ।