पोखरा । कास्कीको अन्नपूर्ण गाउँपालिका वडा ११, किरून्जे नेरेगु स्थित झोलुङ्गे पुलको उद्घाटन गरिएको छ ।

नौलो घुम्ती नेपालको आर्थिक सहयोग तथा गाउँपालिकाको २५ प्रतिशत म्याचिङ फण्ड गरी कुल ९६ लाख लागतमा सो पुल निर्माण गरिएको हो । कुल १ सय २० मिटर लम्बाइको सो पुल जिल्लाकै सबैभन्दा अग्लो स्थानमा बनेको दाबी छ ।

पुल उद्घाटन गर्दै अन्नपूर्ण गाउँपालिका अध्यक्ष विष्णुबहादुर केसीले ठूलो मेहेनतका साथ पुल निर्माण गरिएको जनाउँदै पुलले त्यस क्षेत्रका वासिन्दाको जीवनयापनमा सहजता थप्ने औँल्याए । गाउँपालिका विकासको पक्षमा रहेको भन्दै पालिका अध्यक्ष केसीले विकास निर्माणमा चाँसो राख्न स्थानीयलाई सुझाए ।

वडाध्यक्ष हिमबहादुर गुरुङले वडा सधँै जनताको साथमा रहेको स्पष्ट पार्दै जनताका दुःखसुख बुझ्ने प्रयास भइरहने जनाए ।

त्यस अवसरमा निर्माण समिति अध्यक्ष विकल कुँवर, राम गुरुङ, नौलो घुम्तीका इन्जिनियर पदम गुरुङ साथै घुर्जङ आमा समूह, मलेचे आमा समूह तथा किम्रोङ आमा समूहका प्रतिनिधिले पनि भनाइ राखे ।

निर्माण समिति अध्यक्ष कुँवरको अध्यक्षतामा भएको उक्त कार्यक्रम सेञ्चुरी युवा क्लब अध्यक्ष मिकास गुरुङले संचालन गरे।