पोखरा । पोखरा बहुमुखी क्याम्पसको ३८ औं साधारणसभा तथा वार्षिकोत्सव पूर्व सन्ध्यामा बिहीबार कविता वाचन भयो । यसअघि निबन्ध प्रतियोगितालगायत कार्यक्रम भइसकेका छन् ।

कविता प्रतियोगितामा क्याम्पसका विभिन्न शैक्षिक संकायका १२ जना विद्यार्थीले भाग लिएका थिए । निबन्ध प्रतियोगितामा १६ जना विद्यार्थी सहभागी थिए । उनीहरुले प्रकृति, वातावरण संरक्षण, सामाजिक विभेद, शिक्षा, स्वस्थ्य लगायत विषयमा निबन्ध तथा कविता लेखेका थिए ।

निर्णायकमा प्राध्यापकहरु अनुपमणि अधिकारी, आइतकुमारी गुरुङ र बिदुर पराजुली लगायत थिए । प्रतियोगिताको नतिजा शुक्रबार हुने साधारणसभा तथा वार्षिकोत्सव मूल समारोहमा घोषणा गरिनेछ ।

वार्षिकोत्सव पूर्व सन्ध्यामा क्याम्पसले व्यवस्थापन विभाग प्रमुख प्राध्यापक दीपक घिमिरेको संयोजकत्वमा रक्तदान कार्यक्रम र मानविकी विभाग प्रमुख पुष्पराज अधिकारीको संयोजकत्वमा सरसफाइ कार्यक्रम गरेको थियो ।