पोखरा । शान्ति निकेतन स्कुल, पस्र्याङमा दुइदिवसीय वार्षिक खेलकुद कार्यक्रम सुरू भएको छ । कार्यक्रमको नेपाल ओलम्पिक कमिटी केन्द्रीय उपाध्यक्ष तेजबहादुर गुरूङले उद्घाटन गरे । उनले कार्यक्रम संयोजक सुरज अधिकारीलाई बल हस्तान्तरण गरेका थिए ।

प्रदेश खेलकुद परिषद् गण्डकीका संस्थापक सदस्यसचिव समेत रहेका गुरूङले अध्ययनसँगसँगै खेलकुदमा पनि विद्यार्थीकालबाटै लाग्नुपर्नेमा जोड दिँदै यसका लागि अभिभावकले नै प्रेरित गर्नुपर्ने आवश्यकता औंल्याए । उनले खेलले हारमा पनि आशा जगाउन सिकाउने बताउँदै खेलकुदले जिन्दगीमा आइपर्ने दुःखसुखसँग सामना गर्न सक्ने क्षमताको वृद्धि गर्ने उल्लेख गरे । खेलकुदमा जात, धर्म, वर्गमा विभेद नगर्ने भएकाले समान भावनाको विकास गराउने बताए । आफ्नो बच्चालाई अरुसँग तुलना गर्न नहुने सुझाव दिँदै उनले तुलना गर्दा बच्चाले उनीहरुसँग हीनताबोध गरेर झनै आत्मविश्वास गुमाउने बताए ।

स्कुलका संस्थापक प्राचार्य डा. महेश्वर पराजुलीले स्वस्थ शरीर र स्वस्थ मस्तिष्कले राम्रो ज्ञान प्राप्त गर्ने हुँदा विद्यालयले पठनपाठनसँगै खेलकुदलाई पनि उत्तिकै महत्व दिँदै आएको बताए । डा. पराजुलीले शान्ति निकेतन उत्कृष्ट नतिजाका कारण परिचित बनेको बताउँदै अतिरिक्त तथा खेलकुद क्षेत्रमा पनि स्कूलका विद्यार्थीले विद्यालयको नाम राख्नेमा आशावादी रहेको बताए ।

विद्यालयका सल्लाहकार सोमनाथ भूत्र्यालले विद्यालयको अभिभावकको पक्षबाट हेर्दा विद्यालयको प्रगतिका कारण आफू निकै खुशी रहेको उल्लेख गरे ।

विद्यालय व्यवस्थापन समिति अध्यक्ष कृष्णमणि भूत्र्यालले शान्ति निकेतनका विद्यार्थीको उत्कृष्ट नतिजाका कारण विद्यालय व्यवस्थापन टीम, शिक्षक, अभिभावक र विद्यार्थीहरु सबै गौरवान्वित रहेको बताए ।
कार्यक्रममा पत्रकार कमल पौडेल ‘अथक’, सहप्राचार्य यदुविलास भूत्र्याल, परीक्षा संयोजक हेम सुवेदीलगायतले बोलेका थिए ।

कुल २ सय ९० पदकका लागि भएको खेलकुद प्रतियोगितामा भलिबल, फुटबल, टेबलटेनिस, चेस, सटपुटलगायत खेल हुनेछन् । सिनियर (कक्षा ६–९), प्राइमरी सिनियर (कक्षा ३–५), प्राइमरी जुनियर (कक्षा १–२), प्रि–प्राइमरी जुनियर (नर्सरी–यूकेजी), प्रि–नर्सरी तहमा प्रतिस्पर्धा हुनेछ ।