पोखरा । नवलपुरको यातायात व्यवस्था कार्यालयले सेवा प्रवाह गर्न टोकन प्रणाली लागु गर्ने भएको छ । गण्डकी प्रदेशका भौतिक पूर्वाधार विकास तथा यातायात व्यवस्था मन्त्री प्रकाशबहादुर केसीको बुधबार निर्देशनपछि कार्यालयले सेवा सुधारको योजना बनाएको हो ।

मन्त्री केसी बुधबार सो कार्यालय निरीक्षणमा पुगेका थिए । त्यहाँ सेवाग्राहीले हरेक कामलाई लाइन बस्नुपर्ने झन्झट भएको गुनासो गरे । त्यसपछि उनले कार्यालयका निमित्त प्रमुख सुरेश जैसवाललाई दुई दिन तयारी गरेर टोकन प्रणालीको सुरुवात गर्न निर्देशन दिए । निमित्त प्रमुख जैसवालले आवश्यक तयारी गरेर निर्देशनअनुसार काम गर्ने बताए ।

मन्त्री केसीले यातायात कार्यालयका सेवा प्रवाहको अवस्था, कार्यालयको समस्याको विषयमा कार्यालयका कर्मचारीसँग ब्रिफिङ लिए । नि. प्रमुख जैसवालले लाइसेन्ससम्बन्धी सम्पूर्ण सिस्टम यातायात व्यवस्था विभागमा रहेको र सच्याउने अधिकार पनि नभएको गुनासो गरे । ‘कहिलेकाहीँ केही विवरण बिग्रियो भने सच्याउन पर्छ तर हामीले विवरण अपडेट गरेपछि हाम्रो हातमा केही हुँदैन । त्यो सच्याउने अधिकार पनि हामीलाई छैन,’ उनले भने ।

कहिलेकाहीँ विभागको सिस्टम नचल्दा सेवाग्राहीले गुनासो पोख्ने र चाप बढ्ने गरेको नि.प्रमुख जैसवालले बताए । उनले लिखित र ट्रायल परीक्षा सकिएको एक हप्ताभित्र नतिजा सार्वजनिक गरिँदै आएको जानकारी गराए । नि. प्रमुख जैसवालले गत आर्थिक वर्षमा ३३ करोड रुपैयाँ, चालु आर्थिक वर्षको चार महिनामा कार्यालयले साढे ८ करोड रुपैयाँ राजस्व संकलन गरेको जानकारी दिए ।

ब्रिफिङपछि मन्त्री केसीले सर्भर समस्या देशव्यापी भएको तर विभागीय मन्त्रीको हैसियतले यातायात व्यवस्था विभागको ध्यानाकर्षण गराउने बताए ।

ब्रिफिङपछि मन्त्री केसीले लाइसेन्स विषय निस्किएपछि कड्किए । कार्यालयको बारेमा आफूले सकारात्मक कुरा नसुनेको भन्दै सचेत गराए । ‘लाइसेन्सको बारेमा मैले कार्यालयको बारेमा राम्रो सुनेको छैन । दायाँबायाँ गरेको अब सुन्न नपरोस्,’ मन्त्री केसीले चेतावनी दिए,‘भोलि प्रमाणसहित फेला प¥यो भने बहानाबाजी चल्दैन । अख्तियारले समात्यो भने तपाईंहरुलाई पनि नराम्रो हुन्छ । मन्त्रालय र प्रदेश सरकारलाई पनि नराम्रो हुन्छ ।’ जवाफमा कार्यालयका कर्मचारीले बाहिर भनिएजस्तो अनियमित काम नहुने गरेको बताए ।

लाइसेन्स र ट्रायलमा गडबडी नगर्न, सेवाग्राहीलाई दुःख नदिन र सेवा लिँदा सहज वातावरण बनाउन, आफूले मन्त्री भएपछि हेल्प डेस्क राख्ने भनेर गरेको पहिलो निर्णयलाई निरन्तरता दिन मन्त्री केसीले कर्मचारीलाई निर्देशन दिए ।

भौतिक मन्त्री केसीले बुधबार नै पूर्वाधार विकास कार्यालय, नवलपुरको पनि निरीक्षण गरे । त्यहाँ मन्त्री केसीलाई कार्यालय प्रमुख कृष्ण आचार्यसँग चालु आवको योजना कार्यान्वयनको अवस्थाबारे जानकारी गराए । उनले चालु आर्थिक वर्षका योजनामध्ये १ सय ३ योजना कार्यान्वयनको अवस्थामा रहेको बताए ।

मन्त्री केसीले चालु आर्थिक वर्षको ठेक्का लगाउन बाँकी योजनाको काम पनि मंसिरभित्रै सक्न निर्देशन दिए । निरीक्षणमा मन्त्री केसीसँगै मन्त्रालयका सचिव कमलकुमार अधिकारी, मन्त्रालयको योजना अनुगमन मूल्यांकन तथा पूर्वाधार महाशाखा प्रमुख डा. महेन्द्र बानियाँ पनि सहभागी थिए ।