पोखरा । हीरक महोत्सव अवसरमा राष्ट्रिय मावि, पोखरा–१ ले आयोजना गरेको कास्की जिल्लास्तरीय छात्रछात्रा भलिबल प्रतियोगितामा छात्रतर्फ गुरुकुल विद्या सदन र छात्रातर्फ करुणानिधि एजुकेशन फाउण्डेशन (केफ), माविले उपाधि जितेका छन् ।

सोमबार छात्रतर्फ फाइनलमा माउण्ट अन्नपूर्णलाई ३–० को सोझो सेटमा पराजित गर्दै गुरुकुलले उपाधिसँगै ५० हजार, ट्रफी र मेडल हात पारेको हो । उपविजेता माउण्ट अन्नपूर्णले ३० हजार, तेस्रो भएको न्यू ग्यालेक्सीले १५ हजार साथमा ट्रफी र मेडल पाए ।

गुरुकुलका अरबिन्द सुनार उत्कृष्ट खेलाडी घोषित हुँदै ५ हजार र मेडल जिते ।

यसैगरी, छात्रातर्फ केफले शान्ता माविलाई ३–१ सेटमा पराजित गर्दै उपाधिसहित ५० हजार, ट्रफी र मेडल हात पार्न सफल भएको हो ।

उपविजेता शान्ताले ३० हजार, तेस्रो पश्चिमाञ्चल माविले १५ हजार साथमा ट्रफी र मेडल प्राप्त गरे । केफकी धनकुमारी बिक उत्कृष्ट खेलाडी घोषित भइन् । उनले ५ हजार र मेडल प्राप्त गरिन् ।
प्रतियोगितामा छात्रतर्फ २६ र छात्रातर्फ १३ टिमले भाग लिएका थिए ।

विद्यालयले हीरक महोत्सवकै अवसरमा छात्र–छात्रा परम्परागत छेलो (ठेलो) प्रतियोगितासमेत गरेको छ । छात्रतर्फ त्रिभुवन शान्तिका लक्सन पुर्जा पुन प्रथम भए । भद्रकाली माविका शंकर बिक दोस्रो र गुरुकुल विद्या सदनका मनोज सिर्पाली तेस्रो भए ।

सोही इभेन्टमा, छात्रातर्फ त्रिभुवन शान्तिकी शशी रानाभाट, गौरीशंकरकी डोल्मा छन्त्याल र राष्ट्रिय माविकी सञ्जिता बिक क्रमशः प्रथम, दोस्रो र तेस्रो भए ।

दुवैतर्फ प्रथमले ५ हजार, दोस्रोले ३ हजार र तेस्रोले २ हजार साथमा पदक र प्रमाणपत्र पुरस्कार प्राप्त गरेको खेलकुद कार्यक्रम संयोजक तेजबहादुर गुरुङले जानकारी दिए ।

विजयीलाई प्रमुख अतिथि शिक्षा निर्देशनालय गण्डकीका नि.महानिर्देशक अम्बिका आचार्य, पोखरा १ का वडाध्यक्ष साहारा प्रधान, विद्यालय व्यवस्थापन समितिका कावा अध्यक्ष बरुणविक्रम राणा, खेलकुद कार्यक्रम संयोजक तेजबहादुर गुरुङ, शिक्षक–अभिभावक संघ अध्यक्ष रमेश पौडेल, विद्यालय प्रधानाध्यापक ईश्वरीप्रसाद सापकोटालगायतले पुरस्कार प्रदान गरे ।

पोखराको पुरानो स्कुल राष्ट्रिय माविले वर्षभरि विविधि कार्यक्रम गरी हीरक जयन्ती मनाउँदैछ ।