पोखरा । उच्च शिक्षालय तथा माध्यमिक विद्यालय संघ नेपाल (हिसान), कास्की आयोजनामा १७ औं हिसान कास्की स्पोर्टस् मिट–२०८१ को मंगलबारदेखि औपचारिक सुरुआत भयो ।

पोखरा रंगशालास्थित बास्केटबल कोर्टमा आयोजित समारोहमा गण्डकी प्रदेश प्रमुख डिल्लीराज भट्टले समुद्घाटन गरेका हुन् । उनले स्वस्थ शरीरमा स्वस्थ मन हुने बताउँदै स्वस्थ तनमनले नै ज्ञान लिन सक्ने बताए । उनले स्वास्थ्यका लागि खेलकुदको महत्वलाई प्रष्ट पार्दै भने, ‘स्वस्थ शरीर नै एउटा मान्छेका लागि सुख र आनन्द हो । अनुशासित स्वस्थ शरीर र स्वस्थ मस्तिष्कयुक्त नागरिक उत्पादनमा खेलकुद सहयोगीसिद्ध छ ।

खेलकुद र शिक्षा एकअर्काका पूरक भन्दै उनले यसलाई तालमेल मिलाउँदै हिसान कास्कीले १७ वर्षदेखि यसप्रकारका गतिविधि गरेकोमा धन्यवाद व्यक्त गरे । ‘विद्यालयमा विभिन्न क्षेत्र, लिंग, वर्ग, संस्कृति र सामाजिक परिवेशका बालबालिका अध्ययन गर्न आउँछन् । उनीहरूलाई शिक्षासँगै खेलकुदको माध्यमबाट सर्वाङ्गीण विकासका लागि विद्यालयको महत्वपूर्ण भूमिका हुन्छ,’ उनले प्रस्ट पारे ।

खेलकुद विकासको आधार स्तम्भ विद्यालय रहेको बताउँदै उनले दक्ष जनशक्ति, सुयोग्य नागरिक उत्पादनको कारखानाको रूपमा रहेको विद्यालयमा खेलकुदको विकासको विकल्प नरहेको बताए । उनले सशक्त र पूर्वाधारसम्पन्न मुलुकलाई खेलकै माध्यमबाट पराजित गर्न सकेको र खेलकुदले राष्ट्रको गौरव, सान, मान, पहिचान स्थापित गरेको बताए ।

हिसान केन्द्रीय अध्यक्ष रमेशकुमार सिलवालले खेलकुदले सबैलाई एकताबद्ध बनाउन सहयोग पुग्ने बताए । उनले राज्यले खेलकुदमा लगानी बढाउनेतर्फ ध्यान नदिएको गुनासो गरे ।

हिसान कास्कीका निवर्तमान अध्यक्ष एवं १७ औं हिसान स्पोर्टस मिट संयोजक यामबहादुर रोक्काले स्पोर्टस् मिट महोत्सवरुपमा अघि बढेको उल्लेख गरे ।

सो अवसरमा नेपाली राष्ट्रिय भलिबल टिम कप्तान अरुणा शाहीलाई नगदसहित सम्मान गरिएको थियो । भलिबल खेलमार्फत राष्ट्रलाई चिनाउन उनले पु¥याएको योगदानको कदर गर्दै नगद २५ हजार ५५५ रुपैयाँसहित सम्मान गरिएको हो । यस्तै, प्रदेश प्रमुख भट्टले कप्तान शाहीलाई आफ्नोतर्फबाट समेत नगद ५ हजार हस्तान्तरण गरे ।

सम्मानित शाहीले हिसान कास्कीप्रति आभार व्यक्त गर्दै युवा खेलाडीहरुलाई शिक्षासँगै खेलकुदमा लाग्न आग्रह गरिन् । उनले सक्षम खेलाडी उत्पादनका लागि हिसान स्पोर्टस् मिट जस्ता कार्यक्रमहरु सहयोगी हुने बताउँदै मेहनतले सफलता प्राप्त गर्न सकिने बताइन् ।

हिसान कास्की अध्यक्ष दिवाकर जैशीको अध्यक्षतामा भएको कार्यक्रममा मयुर नाच प्रस्तुत गरिएको थियो ।

सो अवसरमा संस्थाले आयोजना गरेको अंगेजी–नेपाली निबन्ध लेखन प्रतियोगिताका विजयीलाई समेत पुरस्कृत गरिएको थियो । कार्यक्रम संचालन हिसान कास्की सचिव किरण सापकोटा र स्वागत कार्यक्रम संयोजक रोक्काले गरेका थिए ।

हिसान कास्कीमा आबद्ध प्लस टुतर्फ ६६ तथा कलेज र विश्वविद्यालय गरी १५ मध्ये कुल ६१ शिक्षण संस्थाले स्पोर्टस् मिटमा सहभागिता जनाउँदैछन् । सबै प्रतियोगितामा गरी कुल ४ हजारभन्दा बढी विद्यार्थी मैदान उत्रिदैछन् । प्रतियोगिता सम्पन्न गर्न करिब २५ लाख खर्च हुने आयोजकको अनुमान छ । विजेता विद्यालयले रनिङ शिल्ड, ट्रफी, मेडल तथा प्रमाणपत्र प्राप्त गर्नेछ । मुख्य प्रायोजक आइएनजी ग्रुप हो । प्रतिभा माविले १५ औं र १६ औं संस्करणको उपाधि जितेको थियो ।

यसपालि १४ मंसिरसम्म चल्ने स्पोर्टस् मिटमा प्लस टु, कलेज र विश्वविद्यालयतर्फका खेलाडीहरु विभिन्न चार खेल बास्केटबल, भलिबल, व्याडमिन्टन र टेबुल टेनिसका छुट्टाछुट्टै इभेन्टमा प्रतिष्पर्धा गर्दैछन् । प्रतियोगिताअन्तर्गत अघिल्लो दिन सोमबार नै बास्केटबलका खेल सुरु भएका थिए ।