पोखरा । दिगो विकासमा युवाको भूमिका महत्वपूर्ण हुने एक कार्यक्रमका वक्ताले जोड दिएका छन् । उनीहरुले नेतृत्वलाई उमेर समूहले मात्र अर्थ नराख्ने हुँदा नेतृत्वमा सोच, इच्छाशक्ति र स्पष्टता आवश्यक पर्ने बताए ।

हालै आयोजित पोखरा जेसीजको ४५ औं शाखा अधिवेशन तथा ५० औं वार्षिक साधारण सभाको उद्घाटन समारोहमा उक्त विचार व्यक्त भएको हो ।

पूर्व अर्थमन्त्री एवं नेपाल राष्ट्र बैंकका पूर्व गभर्नर डा. युवराज खतिवडाले दिगो विकासका लागि युवा नेतृत्व विषयमा आफ्नो भनाइ राखे ।

प्रधानमन्त्री केपी शर्मा ओलीका आर्थिक मामिला सल्लाहकार समेत रहेको डा.खतिवडाले दिगो विकासका लागि समाजमा रहेको चरम गरिबी हटाउनु पर्ने कुरामा जोड दिए । युवा विदेश पलायन हुने परिस्थिति मुख्यतया आयआर्जन नै भएको हुँदा गरिबी हटाउँदै अर्थतन्त्रको सुधारको लय समाउन सक्नुपर्ने बताए ।

कार्यपत्र प्रस्तुत गर्दै नेपाल जेसीजका पूर्व राष्ट्रिय अध्यक्ष तथा अष्ट्रेलियाका लागि पूर्व नेपाली राजदूत महेशराज दाहालले नेतृत्वलाई उमेर समूहले मात्र अर्थ नराख्ने हुँदा नेतृत्वमा सोच, इच्छाशक्ति र स्पष्टता आवश्यक पर्ने बताए ।

प्रतिनिधिसभा सदस्य एवं कांग्रेस नेता डा. चन्द्र भण्डारीले नेतृत्व परिवर्तनले नै साचो अर्थमा दिगो विकासको आधार तय गर्ने बताए । उनले युवाले नेतृत्व लिएमा आफ्नो आवश्यकता अनुसार विकासको काम गर्ने बताए ।

पोखरा जेसीजका अध्यक्ष देवराज शर्माको अध्यक्षतामा भएको कार्यक्रममा पोखरा जेसीजका प्रकरण निर्देशक विजय बरालले सञ्चालन गरेका थिए ।

क्रिष्टल महलमा भएको कार्यक्रममा पोखरा जेसीजका पूर्व अध्यक्षहरू, सदस्यहरू, विभिन्न सामाजिक संघसंस्थाका प्रतिनिधिसमेत गरी २ सय ५० जनाको उपस्थिति रहेको पोखरा जेसीजका महासचिव तिलकप्रसाद लामिछानेले जानकारी दिए ।