पोखरा । पोखरा महानगरपालिका ८ नम्बर वडा बाल मञ्च आयोजनामा ‘सामाजिक मिडिया समाजका लागि हानिकारक नभई, लाभदायक’ विषयक वादविवाद प्रतियोगिता भएको छ ।

प्रतियोगितामा जनप्रिय माविकी कञ्चन बिक प्रथम भएकी छन् । यस्तै, सृजना माविकी सपना शर्मा द्वितीय, लक्ष्मी आवासीय माविकी सृष्टि आचार्य तृतीय र राम आधारभूत विद्यालयका मिसन मगर सान्त्वना भए ।

निर्णायकमा साहारा आधारभूत विद्यालयका प्रअ लोचना अधिकारी, अधिवक्ता एवं पत्रकार सुष्मा पौडेल र पोखरा महानगरपालिका सामाजिक शाखाकी बेलकुमारी गुरुङ थिए ।

प्रतियोगितामा न्यू मोडलकी सृष्टि बराल, सिर्जना माविकी अपेक्षा अधिकारी, राम आविकी सन्ध्या चौधरी र पलसरी बुढा, लक्ष्मी आवासीयकी प्रकृति ठकुरी, पोखरा एकेडेमीकी आयुषा रानाभाट र शिखा पुनले समेत भाग लिएका थिए ।

वडा अध्यक्ष रुद्रनाथ बरालले प्रतियोगिता उद्घाटन गर्दै बालबालिकाको चौतर्फी विकासमा वडा कार्यालय सधैँ सहकार्य गर्न तत्पर रहेको बताए ।

वडा सदस्य पवित्रा केसीले वडा ८ मा एक सार्वजनिक विद्यालय र १० निजी विद्यालय रहेको बताउँदै सबैलाई सहभागी गराउन नसके पनि ६ विद्यालयका ११ विद्यार्थी सहभागी भएको बताइन् ।

पृथ्वीनारायण क्याम्पसका सहप्राध्यापक डा. नवराज न्यौपानेले विद्यार्थीलाई विभिन्न प्रतियोगितामा सहभागी गराउँदा पढाइ साथै अन्य क्षेत्रमा पनि सक्षम हुन मद्दत मिल्ने बताए ।

विद्यालयका प्रधानाध्यापक तीर्थराज न्यौपानेले अहिले बालबालिका मोबाइलबिना कुनै पनि काम गर्न नसक्ने अवस्थामा पुगेको बताए ।

बाल मञ्च अध्यक्ष सुशान न्यौपाने, सचिव समीप सापकोटाले संचालन गरेको कार्यक्रममा स्वागत उपाध्यक्ष कृष्मा गिरीले गरेकी थिइन् ।