पोखरा । सामाजिक सेवामा क्रियाशील पोखराको युनाइटेड क्लबले गरिब विद्यार्थीलक्षित गरी छात्राबास निर्माण सुरु गरेको छ । क्लबले पोखरा २७, अर्चलेमा निर्माण गर्न लागेको उक्त छात्राबासको सोमबार प्रतिनिधि सभा सदस्य मनबहादुर गुरुङले शिलान्यास गरे ।

क्लबका संस्थापक अध्यक्ष तथा युनाइटेड आवासीय छात्रावास निर्माण समिति संयोजक हिमालय बख्रेलले क्लबको परियोजनारुपमा आवासीय छात्रावास निर्माण गर्न लागिएको जानकारी दिएन । उनले निर्माणमा तीनै तहको सरकारको सहयोग आवश्यक रहेको बताए । करिब ४ करोड लागतमा निर्माण हुने छात्राबासमा सरकारी, विभिन्न निकाय, संघसंस्था तथा व्यक्तिहरुको सहयोग आवश्यक रहने उनले बताए ।

८ रोपनीमा निर्माण हुने दशकोठे छात्राबासमा ५० जना विद्यार्थी क्षमताको हुनेछ । पहिलो वर्ष ४ कोठाको भवन निर्माण सम्पन्न गरी विद्यार्थी राख्ने र वर्षैपिच्छे निर्माण कार्य निरन्तरता दिने उनले सुनाए ।

शिक्षा, स्वास्थ्य, खेलकुद र पर्यटन प्रवद्र्धनमा युनाइटेड क्लब पोखरा चर्चित छ । क्लबले बर्सेनि पोखराको अमरसिंहचौरमा पोखरा महोत्सव आयोजना गर्छ ।

सांसद गुरुङले क्लबले महोत्सव आयोजना गरी सामाजिक काम मार्फत अगाडि बढिरहँदा हाल आएर गरिब विद्यार्थीलक्षित गरी छात्राबास निर्माण थालनी गर्नु आफैँमा सह्रानीय काम भएको बताए । उनले निर्माणमा व्यक्तिगततर्फबाट सक्दो सहयोग गर्ने तथा विभिन्न मन्त्रालय र विभागमा समेत उक्त योजना अगाडि बढाउन पहलकदमी गर्ने प्रतिबद्धता समेत ब्यक्त गरे ।

पोखरा २७ का वडा सदस्य सूर्यबहादुर वाग्लेले आफ्नो वडा त्यसमा पनि कविशिरोमणि लेखनाथ पौड्यालको जन्मस्थल नजिकै छात्रावास निर्माणमा वडाको तर्फबाट सक्दो सहयोग रहने बताए । छात्राबाससम्म पुग्न वडाले यसअघि नै सडक निर्माण गरिसकेको बताउँदै वाग्लेले आगामी दिनमा उक्त सडक स्तरोन्नति गर्ने बताए ।

क्लबका निवर्तमान अध्यक्ष राजु श्रेष्ठले क्लबले स्थापना शिक्षा, स्वास्थ्य, खेलकुद र पर्यटन प्रवद्र्धन र त्यसमा पनि पोखरामा खुला चिडियाखाना निर्माण पहल गर्दै आएको र क्लबकै पहलमा पचभैयामा चिडियाखाना निर्माण जारी रहेको भए तापनि सरकारले खुला चिडियाखाना भन्दा पनि घाइते भएका वन्यजन्तुको उद्धार केन्द्र बनाउनतर्फ अगाडि बढिरहेको बताए ।

क्लब अध्यक्ष लोकबहादुर थापाले छात्राबासले शिक्षाको क्षेत्रमा सानो भए तापनि सहयोग पुग्ने बताए । कार्यक्रममा क्लब पदाधिकारी तथा सदस्यहरु, विभिन्न विद्यालयका शिक्षक, अभिभावक तथा विद्यार्थी, पोखरा २७ का जनप्रतिनिधि, विभिन्न आमा समूहका पदाधिकारी तथा सदस्यहरुसँगै स्थानीयको उपस्थिति थियो । क्लब वरिष्ठ उपाध्यक्ष गणेश तिमिल्सिनाको स्वागत मन्तब्य राखेको कार्यक्रमको सञ्चालन महासचिव दिनेश सुनारले गरेका थिए ।