पोखरा । सुजल फुड्स प्रालिले लोकप्रिय क्यान्डी ‘रिमझिम बल’ पुनः बजारमा ल्याएको छ ।

नेपाली अग्रणी कन्फेक्सनरी उद्योग सुजलले सन् १९७६ मा पहिलोपल्ट ल्याएको उक्त क्यान्डीको मिठो र पिरो स्वादको मिश्रणलाई धेरैको बाल्यकाल यादगार बनाउन सहयोग गरेको थियो । जसलाई माया गरेर ‘ब्ल्याक बल’ पनि भन्ने गरिन्थ्यो ।

सुजल फुड्सले फेरि एकपटक उपभोक्तामाझ पिरो मिश्रित मिठो स्वादको पुरानो याद ताजा बनाउन रिमझिम बल पुनः लन्च गरेको जनाएको छ । यो क्यान्डीको पुरानाको स्वाद जस्ताको तस्तै राखिएको छ । अब ४.५ ग्रामको क्यान्डी मात्र २.५ रुपैयाँमा पाइनेछ । यो आकर्षक जार तथा प्याकेटमा उपलब्ध छ । जसमा क्यान्डीका विशेषता स्पष्ट देख्न सकिन्छ । साथै पारदर्शी डिजाइनले जार तथा प्याकेटको सामग्रीलाई स्पष्टरुपमा प्रस्तुत गर्छ । जारमा १५० पिस र प्याकेटमा ८० पिस स्वादिलो रिमझिम बल राखिएको छ ।

पछिल्लो समय विभिन्न मिडिया प्लेटफर्ममा ओरिजिनल ब्ल्याक बल क्यान्डीबारे निकै चर्चा र उपभोक्ताको मागका कारण यसलाई पुनः पोखराबाट लन्च सुरु गरिएको कम्पनीले जनाएको छ । यो, अब छिट्टै देशैभर उपलब्ध हुनेछ । मिठो पिरो क्यान्डी र ब्लाक बलको ब्यानरमुनि कम्पनीले पुनः लन्चिङका विभिन्न क्रियाकलाप गर्ने जनाएको छ ।