पोखरा । माछापुच्छ्रे रनिङ शिल्डमा ज्ञानज्योति बोर्डिङ स्कुल च्याम्पियन भएको छ ।

माछापुच्छ्रे गाउँपालिका आयोजनामा १२ विद्यालयले भाग लिएको सो प्रतियोगितामा वडा ४, लाहाचोकको ज्ञानज्योति ५ स्वर्ण, २ रजत र १ कास्यसहित च्याम्पियन बनेको हो । उसले रनिङ शिल्डसँगै नगद १५ हजार र प्रमाणपत्र प्राप्त गरेको छ ।

मेहेन्द्र मावि खेलमैदान, लाहाचोकमा ३ दिनसम्म चलेको प्रतियोगितामा ५ स्वर्ण, १ रजत र ३ कास्यसहित माछापुच्छ«े मावि दोस्रो भएको छ । वराह माविले ४ स्वर्ण, ७ रजत र २ कास्यका साथ तेस्रो स्थान प्राप्त गरेको छ । उनीहरुले क्रमशः १० हजार र ७ हजार ५ सय रुपैयाँ साथमा ट्रफी पुरस्कार प्राप्त गरे ।

प्रतियोगितामा अन्तर मावि भलिबल छात्र/छात्रा, कबड्डी छात्र/छात्रा, विभिन्न ट्रयाकमा दौड, हाईजम्म, लङजम्प, ट्रिपलजम्प, ज्याभलिङ थ्रो, सटफुट, मार्चपासलगायत खेल भएको गाउँपालिका खेलकुद विकास समिति सदस्य सचिव हुमबहादुर गुरुङले बताए ।

गाउँपालिका अध्यक्ष मीनबहादुर गुरुङको अध्यक्षतामा भएको कार्यक्रमको संचालन शिक्षा युवा तथा खेलकुद शाखा प्राविधिक सहायक विष्णुप्रसाद अधिकारीले गरेका थिए ।