पोखरा । पोखरा–९, नयाँबजारस्थित गुरुकुल विद्यासदन माविमा वार्षिक कार्यक्रमअन्तर्गत खेलकुद सप्ताह भएको छ ।

जसमा छात्र फुटबल, छात्रछात्रा बास्केटबल, रस्साकस्सी, दौड, रिले दौड, फुटसल (कक्षा १–३) भएको हो । प्रतियोगिता अन्तरिकरुपमा विद्यालयमा तथा बाह्यरुपमा पोखरा २० स्थित भलामचौर मैदानमा भएको थियो ।

विद्यालय अध्यक्ष रवि कार्कीले विद्यार्थीको प्रतिभा प्रस्फुटन गर्न विद्यालय प्रयासमा रहेको स्पष्ट पार्दै पठनपाठन अलावा खेल गतिविधिलाई पनि महत्व दिँदै आएको बताए । उनले अनुशासनलाई ख्याल गर्न विद्यार्थीलाई सुझाव दिँदै सिर्जनशीलता भन्ने कुरा जीवनमै महत्वपूर्ण हुने बताए ।

प्रधानाध्यापक नारायण आचार्यले विद्यार्थीका सकारात्मक क्रियाकलापमा विद्यालय सधैं सहयोगी बन्ने धारणा राख्दै स्वास्थ्यका लागि खेल आवश्यक रहेको औँल्याए ।

त्यस अवसरमा सहप्रधानाध्यापक भुवन सुवेदी, सहायक प्रधानाध्यापक फणीन्द्र अधिकारी, लेखा प्रमुख हरि ढकाल, अतिरिक्त क्रियाकलाप प्रमुख अशोक सोतीलगायतले खेलले चिनारी दिनुका साथै शारीरिक तथा मानसिकरुपमा स्वस्थ राख्न सहयोग पुग्ने बताए ।

विद्यालय अध्यक्ष कार्कीको अध्यक्षतामा भएको उक्त कार्यक्रममा लेखा संयोजक ढकालले स्वागत र अतिरिक्त क्रियाकलाप प्रमुख सोतीले संचालन गरे ।