पोखरा । नेपाल राष्ट्रिय शिक्षक संगठन, पोखरा महानगर समितिले संगठन सुदृढीकरण तथा विस्तार कार्यक्रमअन्तर्गत वडा १ मा शिक्षक भेला गरी वडा कमिटी गठन गरेको छ । संगठनको भेलाबाट श्रीकान्त सापकोटाको अध्यक्षतामा ११ सदस्यीय कार्यसमिति सर्वसम्मत चयन गरेको हो । कार्यसमिति उपाध्यक्ष, सचिव र कोषाध्यक्ष र सहकोषाध्यक्षमा क्रमशः तुलाराम पौडेल, हरि अधिकारी, कलादेवी बराल तथा कृष्णप्रसाद पौडेल छन् । यसैगरी भेलाबाट शिक्षक नारायणप्रसाद पौडेल, इन्द्रमाया बास्तोला, पूनम राणा बस्नेत, जीता पौडेल, सिर्जना पराजुली र जानुका बास्तोला सदस्य चुनिए । केही सदस्य विधानत मनोनीत हुने प्रावधान छ ।

पोखरा १ स्थित संस्कृत माध्यमिक विद्यालयमा आयोजित शिक्षक भेलामा राष्ट्रिय मावि, रत्न आविका शिक्षकको उल्लेख्य उपस्थिति थियो । नेराशिसं गण्डकी प्रदेश समितिका अध्यक्ष रोमहर्षण पौडेलको प्रमुख उपस्थितिमा भएके समारोहमा पोखरा १ का वडाध्यक्ष साहारा प्रधान, नेपाल प्रगतिशील प्राध्यापक संगठन गण्डकी अध्यक्ष विष्णुप्रसाद अधिकारी, नेराशिसं जिल्ला समिति अध्यक्ष तीर्थराज ढकालले शुभकामना मन्तव्य दिए ।

संगठनका प्रदेश समिति अध्यक्ष पौडेलले सांगठानिक गतिविधिको जानकारीसहित शिक्षाको गुणस्तर अभिवृद्धि तथा संगठन सुदृढीकरणका लागि संगठित सदस्यलाई सशक्त भई अघि बढ्न आग्रह गरे ।

पोखरा महानगर समिति अध्यक्ष यामनारायण लामिछानेले संगठनप्रति देशैभरका शिक्षकको आकर्षण बढ्दै गएको जानकारी दिए । नेराशिसं, पोखरा महानगर समिति सचिव नेपाल प्रकाश अधिकारीले सञ्चालन गरेको उक्त कार्यक्रमा जिल्ला सचिव दामोदर तिमिल्सिना, शंकर तिवारी तथा हरि अधिकारीले विविध पक्षमा सहजीकरण गरेका थिए ।