पोखरा । किरण शंकर र सुमिना लोको आवाजमा रहेको ‘मनमाया’ गीतको म्यूजिक भिडियो सार्वजनिक भएको छ ।

पोखरामा शुक्रबार आयोजित समारोहमा उक्त गीतको भिडियो सार्वजनिक गरिएको हो । यो हाइलाइटस नेपाल युट्युब च्यानलमार्फत सार्वजनिक भएको छ ।

गीतमा नेपाल आइडल–१ बुद्ध लामाले संगीत भरेका छन् । राम अविरल बिष्टको शब्द रहेको गीतको अडियो संयोजन लामाकै हो । अर्को प्रोडक्सनको निर्माणमा तयार भएको गीतलाई रोहन नेपालीले निर्देशन गरेका छन् । भिडियो अनुप गुरुङले खिचेका हुन् ।

मिलन शंकर, अश्विनी शाही र राजेश बस्नेतलगायतको मुख्य अभिनय रहेको छ भिडियाले महिलामाथि दमन हुँदा पुरुष कसरी रक्षाकवच बन्छ भन्ने भाव प्रस्तुत गर्छ ।

निर्देशनसँगै कथामा रोहन नेपालीको मेहनत छ । उनका अनुसार ‘मनमाया’ गाउँको कथा हो । गीतमा रमाइलोभन्दा सन्देश प्रवाह गर्न खोजिएको उनले बताए ।

कलाकार मिलन शंकरले आफूले अहिलेसम्म थुप्रै म्यूजिक भिडियोमा अभिनय गरेको तर गाउँले परिवेशको कथामा पहिलो पटक देखिएको उल्लेख गरे ।

गायक तथा संगीतकार विनोद बानियाँले ‘मनमाया’को अडियोदेखि भिडियोको तारिफ गर्दै पोखराका सिर्जनालाई चलायमान बनाउन सबै एकजुट हुनुपर्ने आवश्यकता औंल्याए ।

चलचित्र निर्देशक नेत्र गुरुङले गीतको ममअनुसार कथा प्रस्तुत भएको र कलाकारको अभिनय समेत राम्रो रहेको बताए ।