पोखरा । राउटे समुदाय पहिला काठका सामग्री बेचेर गुजारा चलाउँथे । अहिले ती खासै बिक्री हुँदैनन् । परम्परागत पेसा संकटमा परेपछि उनीहरु दैनिकी चलाउने खर्चको जोहो गर्न ठाउँठाउँ पुग्छन् ।
सुर्खेतबाट बिहीबार उनीहरु पोखरा आइपुगेका छन् । राउटे समुदायका मुखिया शेरबहादुर रासकोटी शाहीको नेतृत्वमा ७ जनाको टोलीले पोखरा महानगरपालिका र गण्डकीका विभिन्न मन्त्रालय पुगेर आर्थिक सहयोग मागे ।

यही ११ र १२ मंसिरमा परेको मुख्य पर्व बडातिहारको लागि खर्च जुटाउन पोखरा आइपुगेको मुखिया शेरबहादुरले सुनाए । तिहारमा लगाउने लुगा, चामल, तेल, दाल र खसीका लागि चाहिने पैसा जुटाउन जिल्ला–जिल्ला डुल्ने गरेको उनी बताउँछन् ।

‘अचेल काठका भाँडा बिक्री हुँदैन । जन्मेपछि खानैप¥यो । बाँच्नका लागि यसरी माग्दै हिंड्नुपरेको छ,’ उनले गुनासो पोखे, ‘वर्षैभरि ठाउँठाउँ पुगेर पैसा जम्मा पार्छौं । त्यही पैसाले खर्च चलाउँछौं ।’ उनीहरुले संकलन गरेको रकम महामुखियालाई लगेर बुझाउँछन् । उक्त रकम महामुखियाले सबैलाई समानुपातिक हिसाबले वितरण गर्छन् । ‘एक्लै खाने होइन, बाँड्नु पर्छ । ४६ घरलाई बाँड्ने हो,’ उनले भने, ‘हामीले बटुलेको पैसा महामुखियाको हातमा दिन्छौं । महामुखियाले सबैलाई बाँड्छन् ।’

मुख्य पर्व बडातिहारको लागि खर्च जुटाउन पोखरा आइपुगेको मुखिया शेरबहादुरले सुनाए ।

राउटे समुदायले पोखरा महानगरपालिकाबाट र गण्डकीका विभिन्न मन्त्रालयमा पुगेर आर्थिक सहयोगको याचना गरे । ‘बडातिहारमा ७/८ वटा खसि चाहिन्छ । पैसा नभई खसि आउँदैन,’ शाही अघि भन्छन्, ‘रासनपानी पनि चाहियो । सरकारले सहयोग गर्ला भनेर यहाँसम्म आएका हौं ।’ पहिले घर मुखिया नै चन्दा उठाउन निस्किने गर्थे । तर अहिले बुढ्यौली लागेपछि हिंडडुल गर्न छोडिसकेका छन् । उनकै निर्देशनमा आफूहरु सहयोग उठाउन आएको शाहीले सुनाए ।

राउटे समुदाय नेपालको लोपोन्मुख आदिवासीय समुदाय हुन् । उनीहरुले जंगलमै जीवन बिताउँछन् । सुर्खेतमा उनीहरुको ४६ घरधुरी छ । त्यहाँ करिब २ सय राउटे छन् । पोखराबाट सोचेजति सहयोग नपाएको उनीहरुको गुनासो छ । पोखरा महानगरपालिकाले २१ हजार, अर्थ मन्त्रालयले १५ हजार, सामाजिक विकास मन्त्रालयले ७ हजार रुपैयाँ र विभिन्न व्यक्तिहरुले पनि सहयोग गरेका छन् । चन्दा उठाउन मुखिया रासकोटीसँगै मुखिनी गंगा शाही, खेमराज शाही, बन्धावीर शाही, सुकिधर शाही, कृष्णबहादुर शाही र न्यायन पलास शाही खटिएका छन् ।