स्याङ्जा । खुमा अर्याल फाउण्डेसनले नगदसहित महिला क्रिकेटरको सम्मान गरेको छ । आइसिसी महिला यू–१९ विश्वकपका लागि छनोट हुन सफल पुतलीबजार–३ का ३ जना महिला क्रिकेटरलाई फाउण्डेसनले छैटौं स्थापना दिवस अवसरमा नगदसहित सम्मान गरेको हो ।

भीरकोट नगरपालिका ७ बलमाटामा बुधबार आयोजित स्वास्थ्य शिविरसहित खेलाडी सम्मान कार्यक्रममा उनीहरुलाई जनही १ लाखसहित सम्मान गरिएको हो ।

प्रतिनिधि सभा सदस्य राजु थापा, फाउण्डेसन संरक्षक खुमा अर्याल, डा. लुना अर्याल र अध्यक्ष लेखनाथ शर्मा लगायतले खेलाडीहरु पुतलीबजार १ का ज्योत्सिना मरासिनी, १३ का सीमाना केसी र कुसुम गोदारसहित स्याङ्जा क्रिकेट संघ अध्यक्ष दिवाकर थापालाई पनि सम्मान गरे ।

सांसद थापाले खेलका माध्यमबाट स्याङ्जालाई विश्वभर चिनाउन सफल महिला क्रिकेट खेलाडीलाई बधाई दिँदै उनीहरुको हौसला र ऊर्जा बढाउन यस्ताखालका कार्यक्रम प्रभावकारी हुने बताए । हाम्रा खेलाडीहरु स्याङ्जाका मात्र नभई राष्ट्रका गहना भएको बताउँदै सांसद थापाले फाउण्डेसनले स्वास्थ्य, शिक्षा र खेलको क्षेत्रमा पु¥याएको योगदानको प्रशंसा गरे ।

फाउण्डेसनले शिक्षा, स्वास्थ्य, खेलकुद र दैवी प्रकोप लगायतका क्षेत्रमा सहयोग गर्दै आएको छ ।

युएईमा भएको यू–१९ महिला विश्वकपको एसिया छनोटको उपाधि विजेता एवं सन् २०२५ मा मलेसियामा हुने विश्वकप खेलमा पुग्ने नेपाली टिममा स्याङ्जाका ३ जना महिला क्रिकेट खेलाडी सहभागी हुने भएका हुन् । गण्डकीमै कास्कीका एक जना र स्याङ्जाका ३ जना रहेको क्रिकेट संघका अध्यक्ष थापाले जानकारी दिए ।

खेलाडीको ऊर्जा बढाउन र उनीहरुलाई सम्मानसहित ग्रामीण तहका आमनागरिकलाई लक्षित गर्दै विशेषज्ञ चिकित्सकहितको उपस्थितीमा फाउण्डेसनले स्वास्थ्य शिविर गरेको सचिव धु्रव शर्माले बताए ।