लेखनाथ । लेखनाथ उद्योग वाणिज्य संघले आन्तरिक राजस्व कार्यालय पोखराको सहकार्यमा आफ्ना सदस्यका लागि करदाता शिक्षा दिएको छ ।

संघका अध्यक्ष विनोद श्रेष्ठको अध्यक्षतामा आयोजना गरिएको कार्यक्रममा आन्तरिक राजस्व कार्यालयका कर अधिकृत सनु काफ्लेले कर प्रणाली र व्यवसायीहरुले कर प्रणालीमा दिनुपर्ने ध्यान र अहिले करमा आएको छुट व्यवस्थाबारे कार्यपत्र प्रस्तुत गरे ।

व्यवसायीहरुले राखेका जिज्ञासाबारे प्रमुख कर अधिकृत शिव शर्माले प्रस्ट पारे । उनले उद्योगी व्यवसायीहरुले तिरेको राजस्वबाट नै देश चल्ने हुँदा सरकारले उद्योग व्यवसाय गर्नका लागि नयाँ पिढीलाई प्रोत्साहन गर्नुपर्ने र कर सप्ताहको उपलक्ष्यमा सबैलाई बधाई तथा धन्यवाद ज्ञापन गरे ।

कार्यक्रममा राजस्व कार्यालयका कम्प्युटर अपरेटर सुदीप रेग्मीसहित संघका पदाधिकारी, कार्यसमिति सदस्य, सल्लाहकार, वस्तुगत संघ संघसंस्थाका प्रतिनिधि, बजार व्यवस्थापन समितिका प्रतिनिधि, संघका उपसमिति संयोजक र सदस्यहरु, एवं संघका सदस्यहरुको सहभागिता थियो ।

कार्यक्रम संचालन संघका महासचिव जानुका पराजुली अधिकारीले गरेकी थिइन् । धन्यवाद ज्ञापन वरिष्ठ उपाध्यक्ष राजेन्द्र ओझाले गरे ।

‘कर प्रणालीको सार, लगानीको आधार’ भन्ने मूलनारासहित सप्ताहव्यापी रुपमा देशभर राष्ट्रिय कर दिवस–२०८१ मनाइएको छ ।