पोखरा । राष्ट्रिय स्वतन्त्र पार्टीका सभापति रवि लामिछानेविरुद्ध जिल्ला प्रहरी कार्यालय चितवनमा पनि जाहेरी परेको छ ।

सहारा चितवन सहकारीका बचतकर्ताले लामिछाने र पूर्वडिआइजी छविलाल जोशीसहित १० जनाविरुद्ध जाहेरी दिएका हुन् ।

‘जाहेरी परेको छ । अनुसन्धान सुरु भइसकेको छ,’ चितवन प्रहरी प्रमुख एसपी गौतम मिश्रले भने । प्रहरीको अनुसन्धानबाट सहारा सहकारीको १० करोड ८० लाख रुपैयाँ अवैध हिसाबले गोर्खा मिडिया नेटवर्कमा जम्मा भएको देखिएको छ ।

लामिछाने र जोशीविरुद्ध सहकारी ठगी, संगठित अपराध र सम्पत्ति शुद्धिकरण मुद्दामा कास्कीमा अनुसन्धान भइरहेको छ । रवि कास्की प्रहरी हिरासतमा छन् भने जोशीलाई अनुसन्धानका लागि काठमाडौं लगिएको छ ।

उनीहरुमाथि सूर्यदर्शन, सुप्रिम र स्वर्णलक्ष्मी सहकारीको रकम अपचलन गरेको कसूरमा अनुसन्धान भइरहेको हो । सहारा बचतको रकम अपचलनबारे चितवन प्रहरीले यसअघि नै अनुसन्धान गरेर प्रतिवेदन बुझाएको थियो । पूरक जाहेरी आधारमा थप अनुसन्धान गरिने एसपी मिश्रले जानकारी दिए । लामिछाने र जोशीलाई बुटवलको सुप्रिम सहकारी ठगी आरोपमा पनि बयानका लागि रुपन्देही लगेर फर्काइएको छ।

लामिछानेलाई यही ९ मंसिरमा कास्की जिल्ला अदालतमा पुनः म्याद थपपछि काठमाडौं लैजाने प्रहरीको तयारी छ ।