पोखरा । कम्प्युटर एसोसिएसन नेपाल महासंघ (क्यान), कास्कीको १७ औं साधारणसभा तथा १० औं अधिवेशनबाट आगामी नेतृत्वका लागि पुरुषोत्तम कुँवर अध्यक्ष निर्वाचित भएका छन् । संस्थामा १२ वर्षदेखि क्रियाशील कुँवर कस्मिक कम्प्युटिङ सोलुसन एवं कस्मिक एकेडेमी, न्यूरोडका सञ्चालक हुन् ।

१५ सदस्यीय कार्यसमितिको निवर्तमान अध्यक्षमा दुधमान गुरुङ (आशीष), प्रथम उपाध्यक्ष सेवक क्षितिज, द्वितीय उपाध्यक्ष महेन्द्र भूर्तेल, सचिव दामोदर डुम्रे, सहसचिव सुरेश सापकोटा र कोषाध्यक्षमा रुद्रनाथ न्यौपाने चयन भए । सदस्य दीपकराज गिरी, घनश्याम गौतम, बालकृष्ण न्यौपाने, हरिकृष्ण शर्मा, भरत बराल र मुकुन्द योगी छन् । नवनिर्वाचित अध्यक्षले गोविन्दप्रसाद रिजाल र चन्द्रकला बस्नेतलाई सदस्य मनोनीत गरे ।

युवराज पौडेलको संयोजकत्वमा गठित ३ सदस्यीय निर्वाचन मण्डल सदस्यमा एकनारायण चापागाईं र प्रकाशमानसिंह भण्डारी थिए ।

गण्डकी प्रदेशका प्रमुख डिल्लीराज भट्टले शनिबार साधारणसभाको उद्घाटन गरेका थिए । उनले क्यान कास्कीले सूचना प्रविधिको क्षेत्रमा निरन्तर काम गर्दै आएकोमा खुशी व्यक्त गर्दै क्यान इन्फोटेक जस्ता गुणस्तरीय कार्यक्रमलाई निरन्तरता दिन आग्रह गरे । समारोहमा संस्थापक अध्यक्ष जगनबहादुर गुरुङ, केन्द्रीय प्रतिनिधि चिन्तामणि बास्तोला, पोखरा उद्योग वाणिज्य संघ उपमहासचिव सुदीप प्रधानाङ्ग, पूर्व अध्यक्ष गुणनिधि पाण्डेलगायत बोलेका थिए ।

संस्थाका सचिव महेन्द्र भूर्तेलको वार्षिक प्रगति प्रतिवेदन र कोषाध्यक्ष रुद्रनाथ न्यौपानेको आर्थिक प्रतिवेदन सर्वसम्मत पारित भएको थियो ।

अध्यक्ष दुधमान गुरुङको अध्यक्षतामा भएको कार्यक्रममा स्वागत प्रथम उपाध्यक्ष पुरुषोत्तम कुँवर र सञ्चालन सचिव भूर्तेलले गरेका थिए ।

२०६५ सालमा स्थापित क्यान कास्कीको संस्थापक अध्यक्ष जगनबहादुर गुरुङ हुन् । त्यसयता इविन्द्रराज तिवारी, राजेन्द्रकुमार श्रेष्ठ, चण्डीप्रसाद अर्याल, गुणनिधि पाण्डे, चिन्तामणि बास्तोला, युवराज पौडेल, विश्वास भण्डारी र आशीषले नेतृत्व सम्हालीसकेका छन् ।