पोखरा, २ मंसिर । पृथ्वी राजमार्गअन्तर्गत तनहुँको बन्दीपुरमा दुई बस आपसमा ठोक्किँदा एक जनाको मृत्यु भएको छ । दुर्घटनामा दुवै बसमा सवार २९ जना घाइते छन् ।

पोखराबाट नेपालगञ्जतर्फ जाँदै गरेको भे १ ख ३४८७ नम्बरको बस र काठमाडौंबाट पोखरातर्फ आउँदै गरेको जिएए ००७० नम्बरको बस आइतबार दिउँसो ३ः४० बजे बन्दीपुर गाउँपालिका ५, गोरे चौतारा घुम्तीमा ठोक्किएका हुन् । दुर्घटनामा परी जिएए ००७० नम्बरको बसका चालक तनहुँ ऋषिङ पाटन घर भई हाल पोखरा चाउथे निवासी ३९ वर्षीय रामबहादुर परियारको मृत्यु भएको हो ।

दुर्घटनामा घाइते उनको डुम्रेको लक्ष्मी अस्पतालमा उपचारका क्रममा मृत्यु भएको जिल्ला प्रहरी कार्यालय तनहुँका सूचना अधिकारी डिएसपी अशोक थापाले जानकारी दिए ।

घाइतेहरुको लक्ष्मी अस्पताल र मोती अस्पतालमा उपचार भइरहेको छ । ठेगाना नखुलेका करिब १८ वर्षीय रियाद केसी गम्भीर घाइते भएकाले थप उपचारार्थ चितवन मेडिकल कलेज पठाइएको प्रहरीले जनायो ।

अधिकांश घाइतेको शरीरका विभिन्न भागमा चोट लागेको छ । उनीहरुमध्ये केही मध्यम र सामान्य अवस्थामा छन् ।