पोखरा । फूलैफूलको डोली । त्यसभित्र बेरिएको तोरण । त्यसलाई बोक्न बाजागाजा र भजनकीर्तनसहित मानिसको हुल । बाटोभरी नाचगान गर्दै आएको त्यो लाँवालस्कर सेती किनारमा पुगी विधिपूर्वक पूजा गरी तोरण नदी तारिन्छ । पुनः बाजागाजा र भजनकीर्तन तालमा नाचगान गर्दै फर्किन्छन् ।

यो दृष्य पोखरा तुलसीघाट (रामघाट) क्षेत्रमा मंगलबार दिनभर चलिरह्यो । हरिबोधिनी एकादशीको अवसरमा यस क्षेत्रमा बर्सेनि यस्तै दृश्य दोहोरिन्छ । हिन्दू धर्ममा एकादशीलाई भगवान् विष्णुको उपासना गर्ने पर्वको रुपमा लिइन्छ । हरेक एकादशीको दिनमा उपवास बसी भगवान् विष्णुको आराधना गरिन्छ । भगवान् विष्णुको प्रतीकको रुपमा घरघरमा तुलसीको पूजा गरिन्छ । यसै दिन विष्णुको तुलसीरुपी लक्ष्मीसँग विवाह भएको धार्मिक विश्वास आधारमा तुलसीको पूजा गर्ने चलन छ ।

मंगलबार सेती नदीमा फूल तार्न ठूलो संख्यामा भक्तजन डोलीमा फूल, प्रसाद लिएर सेतीमा पुगेका थिए । भजन, कीर्तन, नाचगान गरेर भक्तजन सेती नदीमा पूजा गरेर तोरन सेती नदीमा तारे । सेती नदी किनारको विभिन्न स्थानमा बिहानैदेखि फूल तार्न र पूजा गर्ने भक्तजनको मेला लागेको थियो । सेती किनारको गाईघाट, तुलसीघाट, नारायणथान मन्दिरलगायत क्षेत्रमा एकादशीको दिन भीड हुने गरे पनि रामघाट क्षेत्रमा बढी मात्रामा भक्तजन पुग्ने गरेको नयाँबजार रामघाट धार्मिक क्षेत्र विकास समिति अध्यक्ष रोशन मानन्धरले बताए ।

मंगलबार सेती नदीमा फूल तार्न ठूलो संख्यामा भक्तजन डोलीमा फूल, प्रसाद लिएर सेतीमा पुगेका थिए ।

भक्तजनको मनोकांक्षालाई ध्यानमा राखी समितिले हरेक वर्ष तुलसी विवाह एवं हरिबोधिनी एकादशी मेला आयोजना गर्दै आएको मानन्धरले बताए । सोहीअनुसार गत वर्षभन्दा यो वर्ष बढी भक्तजन उक्त क्षेत्रमा पुगेको उनले जानकारी दिए । ‘गत वर्ष घाट जाने बाटोमा पुल बन्दै थियो । त्यसैले कम मात्रामा मानिसहरु पुगेका थिए,’ उनले भने, ‘यो वर्ष कुनै समस्या छैन । यो वर्ष अत्यधिक भक्तजन आउनुभएको थियो ।’ त्यससँगै पूजापाठ गर्न, तुलसीको बिहे गर्न, स्नान गर्न र मेला हेर्न उत्तिकै संख्यामा रामघाट क्षेत्रमा मानिसहरु पुगे ।

‘अरु ठाउँमा भन्दा रामघाट क्षेत्रमा धेरै नै भक्तजनहरु आउनुहुन्छ । बिहानदेखि बेलुकासम्म ३० भन्दा बढी फूलको डोली ल्याइएको थियो,’ उनले भने, ‘डोली तार्नेहरु पनि धेरै नै थिए । हामीसँग ठ्याक्कै तथ्यांक त छैन तर ५ हजारभन्दा बढी भक्तजन रामघाट क्षेत्रमा आएको आकलन हो ।’ हरिबोधिनी एकादशी मनाउन कास्कीका विभिन्न स्थानसहित स्याङ्जा, पर्वत, तनहुँ लगायत छिमेकी जिल्लाबाट भक्तजन यहाँ आएका थिए ।

तुलसी विवाह महोत्सवलाई हर्षोल्लास तथा व्यवस्थितरुपमा मनाउन धार्मिक क्षेत्र विकास समितिलगायत सामाजिक, संघसंस्था र स्थानीय तहसमेतको सहभागिता थियो ।

भक्तजनको सुविधालाई मध्यनजर गरी सो क्षेत्रमा भौतिक संरचना बनाइरहेको समितिका सचिव उत्तम जोशीले जानकारी दिए । ‘अघिल्लो वर्ष ॐ को प्रतिमा बनाएको हो । यो वर्ष वडाले बजेट दिएपछि केही थपेका छौं,’ उनले भने, ‘अहिले १०८ शिवलिंग, एउटा गणेशको मन्दिर अनि ५ वटा ढुंगेधारासँगै मर्मत सम्भार र गार्डेनिङ काम गरियो ।’ आगामी वर्षका लागि संचरना थप्दै जाने उनी बताउँछन् ।