पोखरा । गण्डकी प्रदेशसभाका सदस्यसमेत रहेका पूर्वमन्त्री राजीव गुरुङ (दीपक मनाङे) अन्ततः जेल चलान भएका छन् ।

मंगलबार बिहान काठमाडौँको सानोभर्‍याङबाट पक्राउ परेका गुरुङलाई अदालतमा उपस्थित गराएर डिल्लीबजार कारागार चलान गरिएको हो ।
सर्वोच्च अदालतका न्यायाधीशद्वय डा. नहकुल सुवेदी र टेकप्रसाद ढुंगानाको इजलासले २० कात्तिकमा मनाङेलाई ज्यान मार्ने उद्योगमा दोषी ठहर गरेको थियो। सर्वोच्च अदालतले तत्कालीन पुनरावेदन अदालत पाटनले गरेको फैसलालाई सदर गरी दोषी ठहर गरेको हो ।

यसअघि तत्कालीन पुनरावेदन अदालत पाटनले ज्यान मार्ने उद्योगमा मनाङेलाई २०६९ सालमा ५ वर्ष कैद सजाय सुनाएको थियो ।

२०६१ सालमा गुन्डाके चक्रे मिलन (मिलन गुरुङ) को हात काटेको घटनाको उनी मुख्य योजनाकार थिए । मनाङे गण्डकी सरकारमा ६ पल्टसम्म मन्त्री बनेको रेकर्ड छ ।