पोखरा । विगत २५ दिनदेखि कास्की प्रहरीको हिरासतमा रहेका राष्ट्रिय स्वतन्त्र पार्टी (रास्वपा) सभापति रवि लामिछानेलाई दुई उपसभापति र कार्यवाहक प्रवक्तासहितका नेताहरुले सोमबार भेटेका छन् ।

उपसभापति डिपी अर्याल, डा. स्वर्णिम वाग्ले, कावा प्रवक्ता मनीष झालगायत नेताहरु हिरासत पुगेका हुन् । करिब आधा घण्टासम्म उनीहरुले पार्टी सञ्चालन, आन्दोलनको परिचालनलगायत विषयमा छलफल गरे । हिरासतबाट फर्केपछि झाले मंगलबार केन्द्रीय समिति बैठक बस्ने र पार्टीको आधिकारिक धारणा सार्वजनिक गर्ने बताए ।

‘सभापतिज्यूलाई भेटेर आएपछि आन्तरिक छलफल गरेर केही निष्कर्षमा पनि पुगेका छौं । यसको आधिकारिकताका लागि राजनीतिक दलको प्रक्रिया पूरा गर्नुपर्छ,’ उनले भने, ‘संगठनको प्रक्रियासहित केन्द्रीय समितिमा छलफल गरेर अहिलेसम्म राज्यसत्ताले गरेको प्रतिशोध र आगामी प्रतिक्रियाबारे जानकारी गराउने छौं ।’ केन्द्रीय बैठकपछि पत्रकार सम्मेलनबाट पार्टीको आगामी कार्यक्रम सार्वजनिक गर्ने उनको भनाइ छ । ‘लोकतन्त्रको आडमा गरिरहेको अधिनायकवादी चरित्रद्वारा हामीले के अनुभव गरिरहेका छौं । त्यसैले विधिको शासन, संविधान, पद्धतिका हिसाबले देश कसरी अगाडि बढ्नुपर्छ र हाम्रो भूमिका के हुनुपर्छ भन्ने विषयमा मिडियासामु उपस्थित हुनेछौं,’ उनले भने ।

उपसभापति डा. वाग्लेले राजनीतिक प्रतिशोध साँध्नकै लागि लामिछानेलाई हिरासतमा राखिएको तर्क गरे । ‘राजनीतिक प्रतिशोध साँध्नकै लागि अनावश्यक हिरासतमा राखिएको हो । हामीले न्यायिक अनुसन्धानमा कहिलै पनि विरोध गरेका छैनौं,’ उनले भने, ‘न प्रमाण नष्ट गर्ने आधार छ, न भागेर जाने आधार छ । न थप अपराध गर्ने आधार छ । १३ दिन थप्ने त अति न भयो भन्ने बुझाइ छ । यसका कारणले रास्वपाप्रति झन् सहानुभूति बढेको छ ।’ लामिछानेको पक्राउलाई उनले कानूनको दुरुपयोग भनेका छन् । ‘यो नैतिक हैसियत नभएका पात्रहरुले कानूनी छिद्रमा टेकेर कानूनी प्रावधानको दुरुपयोग गरिरहेका छन्, यसको उजागर भइरहेको छ,’ अघि भने, ‘आन्दोलन जारी छ । आगामी आन्दोलनको स्वरुपबारे काठमाडौंमा व्याख्या गर्नेछौं । अभियानलाई अझै व्यापकीकरण गर्ने हिसाबले प्रस्तुत हुनेछौं । अन्य साथीहरु पनि जोडिनुहुने छ । केन्द्रीय समितिले स्टेटमेन्ट छिटै निकाल्नेछ ।’

उपसभापति अर्यालले दोस्रो चरणको आन्दोलनको मोडालिटी मंगलबार सार्वजनिक हुने बताए ।

अर्का उपसभापति अर्यालले दोस्रो चरणको आन्दोलनको मोडालिटी मंगलबार सार्वजनिक हुने बताए । ‘आन्दोलन निरन्तर जारी नै छ । विभिन्न चरणमा आन्दोलन भैरहेको छ,’ उनी भन्छन्, ‘दोस्रो चरणको आन्दोलनबारे पत्रकार सम्मेलनबाट स्पष्ट पार्छौं ।’ उनले रविलाई बुटवल लैजाने आधिकारिक सूचना नपाएको बताए । ‘रुपन्देही लाने आधिकारिक कुरा आएको छैन । अस्पष्ट समाचार पाएका छौं,’ उनले भने ।
कार्यवाहक अहिले आवश्यक छैन

अर्यालले तत्कालका लागि कार्यवाहकको जिम्मेवारी आवश्यक नभएको बताएका छन् । दुई उपसभापमध्ये रास्वपाको नेतृत्व कसले लिने भन्ने चर्चा चलिरहेका बेला उनले भने ‘कार्यवाहक सभापति गौण कुरा हो । सिग्नेचरी नै रोकियो भने त्यसमा सभापतिज्यूसँग सल्लाह गरेर अधिकार लिन्छौं ।’ सभापतिको जिम्मेवारी भने लामिछानेले नै चलाउने उनको भनाइ छ । ‘फेरि पनि भन्छु सभापति उहाँ नै हो । विधान छ, विधान मैले चाहेर संशोधन हुने होइन,’ थपे, ‘विधानले दिएसम्म र उहाँले चाहेसम्म पार्टीको सभापति हो भन्ने कुरा स्पष्ट हो । नमरुञ्जेल भन्ने कुरा पनि टीका टिप्पणी भइरहेको छ । उहाँलाई जीवित राख्नुप¥यो, मार्ने किसिमबाट नजाउ भनेको हो’

हिरासतमा बैठक बसेको होइन

उपसभापति अर्यालले सोमबारको भेटघाट बैठक नभएको स्पष्ट पारेका छन् । ‘पार्टीको बैठक हिरासतमा हुन सम्भव नै छैन । ३ बजेदेखि ५ बजेसम्म सर्वसाधारणले भेट्न पाउँछन् । हामी पनि सर्वसाधारणको हैसियतमा भेट्न गएका हौं,’ उनी भन्छन्, ‘यसलाई बैठक भन्ने कुरा आउँदैन ।’ लामिछानेले आफ्नो पक्राउ राजनीतिक प्रतिशोध नै भएकाले आमनागरिकलाई बुझाउन आग्रह गरेका थिए ।