पोखरा । गुरुङ फिल्मका निर्देशक कमल गुरुङ तनहुँमा सम्मानित भएका छन् । शनिबारदेखि तनहुँको दमौली सुरु भएको नेपाल तमु (गुरुङ) विद्यार्थी छोंज धिंको १२ औं राष्ट्रिय महाधिवेशन अवसरमा उनलाई सम्मान गरिएको हो ।

३ दिनसम्म चल्ने महाधिवेशनको उद्घाटन समारोहमा सञ्चार तथा सूचना प्रविधि मन्त्री पृथ्वीसुब्बा गुरुङले सम्मानपत्रले सम्मान गरेका हुन् । गुरुङ समुदायको सांस्कृतिक कला, नृत्य, गीतसंगीत तथा चलचित्रमा पुर्‍याएको अतुलनीय योगदानको कदर गर्दै उनलाई तमु श्रष्टा सम्मान विधाअन्तर्गत सम्मान गरिएको हो ।

लमजुङको क्व्होलासोथार गाउँपालिका–४, भुजुङका कमल अहिले गुरुङ फिल्मका निर्देशक हुन् । भर्खर २८ वर्षका उनी मातृभाषी गुरुङ गीत/संगीतका व्यस्त कलाकार र निर्देशकसमेत हुन् । २०६८ मा उच्च शिक्षाका लागि बेसीसहर झरेका उनी त्यहाँको नवज्योति सांस्कृतिक कला केन्द्रमा आबद्ध भएपछि सुरु भएको उनको कलाकारिता र निर्देशकीय यात्रा निरन्तर छ ।

भुजुङमा निर्माण गरिएको फिल्म ‘मारय ट’ (सुनको फूल) हुँदै ‘म्ले क्यु’ (बिर्साउने पानी), ‘मारक्यु’ (सुनपानी) मा आबद्ध भएर काम गरे । गुरुङ फिल्ममा मनोज गुरुङ र माओत्से गुरुङसँग जोडिएपछि उनले यस क्षेत्रबारे अझ बढी बुझ्ने मौका पाए ।

गुरुङ समाज, समुदाय, चालचलन, रहनसहन, चार्डपर्व, संस्कृति राम्रोसँग बुझ्न थालेका उनले धेरैवटा गाउँको चिनारी म्युजिक भिडियो निर्देशन गरेर पर्यटन प्रवद्र्धनमा समेत टेवा पु¥याएका छन् । उनले यसैवर्षमात्रै गुरुङ फिल्म ‘ङोल्स्यो रानी’ (सोल्टिनी रानी) निर्देशन गरेका छन् ।