लेखनाथ । महिला मात्र सदस्य रहेको लायन्स क्लब अफ लेखनाथ सिमसारले रक्तदान कार्यक्रम गरेको छ । कार्यक्रममा ५४ युनिट रगत संकलन भयो ।

पोखरामा देखिएको रगतको अभाव मध्यनजर राख्दै क्लबको वार्षिक कार्यक्रम अन्तर्गत शुक्रबार पहिलोपटक रगत दिनेहरुलाई केन्द्रित गरी उक्त कार्यक्रम गरेको हो ।

रक्तदानको महत्व र उपयोगिताबारे साथै मधुमेह रोगबारे जानकारी दिने आयोजना गरिएको रक्तदान कार्यक्रमका पहिलो रक्तदाता लेखनाथ उद्योग बाणिज्य संघका अध्यक्ष विनोद श्रेष्ठलाई ब्लड ब्याग हस्तान्तरण गर्दै लायन्स क्लब अन्तर्राष्ट्रिय ३२५ बि आईका गभर्नर विनोद ढुंगानाले लायन्स क्लबले हामीभन्दा कम अवसर पाएकालाई विभिन्न माध्यमबाट सहयोग गर्दै आएको बताए ।

पोखरा ३० का वडाध्यक्ष दुर्गा सुवेदीले लायन्स क्लबले आपत विपतदेखि संकटमा परेका मानिसका लागि सेवा गर्दै आएको र लायन्सले गरेका कामलाई समाजको तल्लो तहसम्म पु¥याउँदै हरेक मानिसमा सामाजिक भावनाको विकास गराउनु पर्ने सुझाव राखेका थिए ।

सोही अवसरमा शिशुवा स्वाथ्य क्लिनिकका संचालन डा. विद्याभूषण ताम्राकार, लायन्स क्लब अन्तर्राष्ट्रिय ३२५ वी आई का एड्भाइजर शैलेन्द्रमोहन भट्टराई र लायन्स क्लब अन्तर्राष्ट्रिय ३२५ बी आई का ब्लड डोनेसन चिफ युवराज खनाललगायतले रोग लाग्नु पूर्व नै आफ्नो स्वास्थ्यबारे सचेत रहन आग्रह गर्दै रक्तदानको महत्व र यसले शरीरमा पार्ने सकारात्मक प्रभावबारे जानकारी गराए ।

लायन्स लेखनाथ सिमसार अध्यक्ष इन्दिरा ओझाको अध्यक्षतामा भएको कार्यक्रममा धन्यवाद ज्ञापन कार्यक्रम संयोजक जानुका पराजुली अधिकारी र संचालन सचिव सञ्जु सुवेदीले गरेकी थिइन् ।