पोखरा । गोरखाको चुमनुब्री गाउँपालिकाले पर्यटकसँग प्रवेश गरेवापत लिने शुल्कबाट करिव आधा करोड संकलन गरेको छ । असोज र कात्तिक महिनाको हालसम्म ४८ लाख ४१ हजार रुपैयाँ संकलन भएको प्रमुख प्रशासकीय अधिकृत मनोज लामिछानेले जानकारी दिए । असोज १ गतेदेखि चौतर्फी आलोचना र विरोधका बीच पर्यटकसँग शुल्क लिन थालिएको हो । गाउँसभाबाटै निर्णय गराएर शुल्क लिन थालेको पालिकाले पर्यटन सम्बद्ध संघ संस्थाको आलोचना राम्रैसँग खेप्यो ।

विदेशी पर्यटकसँग १ हजार र नेपालीसँग २ सयका दरले उठाउने निर्णय गरिएको हो । यो अवधीमा ४ हजार ७ सय ७० विदेशी पर्यटकबाट ४७ लाख ७० हजार र ४ सय ८ नेपालीबाट ८१ हजार ६ सय रुपैयाँ संकलन भएको हो । पालिकाले प्रवेश केन्द्र जगतमा कर्मचारी नै खटाएर उनीहरुबाट शुल्क संकलन थालेको हो । ‘ट्रेकिङका लागि आएका पर्यटकबाट मात्रै शुल्क लिइएको छ । अन्य कामले छिर्ने पर्यटकसँग शुल्क लिइएको छैन,’ उनले भने । भरिया र गाइडसँग पनि शुल्क लिइएको छैन ।

यो वर्ष ८० लाख हाराहारी आम्दानी गर्ने लक्ष्य पालिकाको छ । ‘अन्य स्रोत एक रुपैयाँ पनि छैन । भएको स्रोत पर्यटन नै हो । तर पर्यटन पनि मनास्लु संरक्षण क्षेत्रले कब्जा गरेको छ,’ उनले भने, ‘यो वर्षदेखि पालिकाले शुल्क उठाउँछ । पर्यटकीय क्षेत्रको व्यवस्थापन पनि पालिकाले नै गर्छ ।’ संकलित रकम पर्यटकको सुरक्षा, सरसफाईसँगै संकेत बोर्डहरु राख्न प्रयोग गर्ने पालिका अध्यक्ष निमा लामाले बताए ।

‘हामीले पैसा उठाउने मात्रै होइन । त्यसको उचित प्रयोग पनि गर्छौं,’ उनले भने, ‘पर्यटक अल्झिने ठाउँमा संकेत बोर्ड राख्छौं । सरसरफाईमा खर्च गर्छौं ।’

चुमनुब्री क्षेत्र मनास्लु संरक्षण क्षेत्र आयोजना (एमक्याप) को क्षेत्रभित्र पर्छ । जसले गर्दा प्राकृतिक स्रोतको उपभोग पालिकाले गर्न पाएको थिएन । एमक्यापले पनि यहाँ छुट्टै शुल्क उठाउँदै आएको छ ।

गण्डकीको एउटा पालिका एमक्याप र १५ वटा पालिका अन्नपूर्ण संरक्षण क्षेत्र आयोजना (एक्याप) मा पर्छ । संरक्षित क्षेत्रका पालिका प्रमुख उपप्रमुखहरु त्यसको विरोधमा छन् । प्रदेश सरकारले पनि संरक्षण क्षेत्र प्रदेशलाई हस्तान्तरण गर्न माग गर्दै आएको छ । सरकारले गएको वर्ष थप ५ वर्ष म्याद थपिदिएको छ । त्यसको विरोध जनप्रतिनिधि र कर्मचारीहरुले गरिरहेका छन् ।