पोखरा । गुण्डा नाइकेको छवि बनाएका गण्डकीका पुर्व मन्त्री तथा सांसद राजीव गुरुङ उर्फ दीपक मनाङेलाई सर्वोच्च अदालतले ५ वर्षको कैद सजाय सुनाएको छ । २०६९ सालमा पाटन पुनरावेदन अदालत (हालको उच्च अदालत)ले गरेको फैसलालाई सदर गरिदिएको हो । योसँगै मनाङे केही दिन वेपत्ता जस्तै भए । सञ्चार माध्यमहरुले उनी हराएको खवर प्रकाशन प्रशारण गरे । तर मनाङेले आफु फरार नरहेको बताएका छन् ।

शुक्रबार एक विज्ञप्ति जारी गरी उनले आँफु अदालतको पूर्णपाठ पर्खिरहेको बताएका हुन् । उनले सञ्चार माध्यमले सम्पर्कविहीन भनेर लेखेको समाचार सत्य नभएको भन्दै आपत्ति पनि जनाएका छन् । ‘फैसलाको विषयलाई लिएर विभिन्न सञ्चारमाध्यमहरुमा भ्रामक समाचारहरु आइरहेको पाएको छु । यसमा मेरो आपत्ति छ,’ उनले भने ।

मनाङेले सर्वोच्चको पूर्णपाठ आएपछि आँफै अदालतमा उपस्थित हुने बताएका छन् । अदालतमा विचाराधीन मुद्दामा भएको फैसलाबारे आफ्नो कानून व्यवसायी मार्फत जानकारी पाएको उनले बताए । ‘कानून व्यवसायीबाट जानकारी पाएको त छु । तर पूर्णपाठ पाएको छैन,’ उनले भने, ‘पूर्णपाठ लिखित रुपमा प्राप्त भएपछि अदालतमा उपस्थित हुनेछु ।’ मनाङेको योग्यतासम्बन्धी प्रश्न गर्दै सर्वोच्चमा अर्को रिट पनि विचाराधीन छ ।

उनी विरुद्ध सर्वोच्चको फैसला कार्यान्वयन भए प्रदेश सभा सदस्यको पद रिक्त हुनेछ । मनाङ (ख) मा उपनिर्वाचत गर्नुपर्छ । त्यसका लागि कानूनी प्रक्रिया छन् । सर्वोच्चले पठाएको आधिकारिक जानकारी पाएपछि प्रदेश सभामा जानकारी हुनुपर्छ । नभए सभामुखले सूचना टाँस गरिदिन्छन् । त्यसपछि मात्रै उनको पद रिक्त हुन्छ । ६ महिनाभित्र उपनिर्वाचन गर्नुपर्छ ।