पोखरा । दाङबाट पोखरा भ्रमणमा आएको बस दुर्घटना हुँदा २ जना घाइते भएका छन् । बिहीबार दिउँसो करिब साढे १२ बजे पोखरा–२२, विश्व शान्ति स्तुप नजिकै दाङको नवयुग डान्स क्लबबाट भ्रमणमा आएको रा१ख २१०६ नम्बरको मिनी बस दुर्घटना भएको हो । दुर्घटनामा बस सडक छेउको तिजुको रुखमा अड्किएको थियो ।

दुर्घटनामा दाङ तुल्सीपुर उपमहानगरपालिका ४ बस्ने १७ वर्षीया सन्ध्या रसाइली र तुलसीपुरकी १९ वर्षीया मनषा रसाइली घाइते भएका छन् । बसमा २४ जना सवार थिए ।

वडा प्रहरी कार्यालय बैदाम कास्कीबाट खटिएको टोलीले उद्धार गरेको हो । घाइतेको उपचारका लागि नमस्ते अस्पताल बिरौटा पठाइएको थियो । रुखमा अड्किएको उक्त बस क्रेन सहायताले निकाल्ने पहल भएको जिल्ला प्रहरी कार्यालय कास्कीले जनाएको छ ।