हेमजा । सोमबार दिउँसो परेको असिनाले अन्नपूर्ण–६, लुम्लेको धानवालीमा क्षति पुर्‍याएको छ । असिनाले त्यस क्षेत्रको पात्लेखेत, सीम, विरौटा, मुडी विसाउना, ठूलाखेत, चित्रे घुम्ती, सेरा लगायतका ठाउँमा भित्र्याउने बेला भएका धानवालीमा क्षति भएको हो । सोमबार पटक पटक असिना परेर धानवालीमा क्षति पुगेको वडाध्यक्ष एकदेव देवकोटाले जानकारी दिए ।

किसानले त्यस क्षेत्रमा काठे, रातो, खमल लगायत जातका धान लगाएका छन् । यतिवेला लुम्लेका अधिकाशं घरपरिवार असिना पीडित भएको उनको भनाई छ । ‘करिव ७० प्रतिशत धान झरेको छ । किसान निकै पीडामा छन्,’ उनले भने ।

असिनाले तरकारी वालीमा समेत असर गरेको छ । बेरेला, साग, मुला, धनियाँ, काउली, बन्दा लगायतका अधिकाशं तरकारी नष्ट भएका हुन् । वडा नम्बर ४ सल्यान र ५ नम्बरको झोवाङका किसान पनि असिनाबाट पीडित बनेका छन् ।

असिना प्रभावित क्षेत्रमा अन्नपूर्ण गाउँपालिकाकी उपाध्यक्ष चन्द्रकला देवकोटा अधिकारीको नेतृत्वमा जनप्रतिनिधि र प्राविधिक कर्मचारीले अवलोकन गरेका छन् । अनुगमनका क्रममा धेरै ठाउँको धानवाली अत्यधिक क्षति पुगेको भेटिएको उपाध्यक्ष अधिकारीले सुनाइन् । पालिका अध्यक्ष विष्णुबहादुर केसीले गाउँपालिका किसानको पक्षमा रहेको भन्दै क्षतिका आधारमा राहतका लागि पहल गर्ने बताए ।