पोखरा महानगरपालिकाका मेयर धनराज आचार्य र उपमेयर मञ्जुदेवी गुरुङ विदेश भ्रमणमा छन् । मेयर आचार्य संयुक्त राष्ट्र संघ मानव बसोबास कार्यक्रमले आयोजना गरेको कार्यक्रम दिगो शहरी विकास र मानव बसोबास सम्बन्धी छलफलमा सहभागी हुन इजिप्ट गएका हुन् ।

उपमेयर गुरुङ पारिवारिक भेटघाटका लागि साइप्रस गएकी छन् । दुवैजनाको अनुपस्थितिमा पोखराको कार्यवाहक मेयरको जिम्मेवारी वडाध्यक्ष तथा प्रवक्ता समेत रहेका मोति तिम्सिनालाई दिइएको छ । उनी पनि लामो समय अमेरिका बसेर नेपाल फर्किएका हुन् ।

तिम्सिना यसअघि पनि कार्यवाहक बनेर काम गरिसकेका छन् । २०८० बैशाखमा उनले १ साता कार्यवाहक भएर काम गरेका थिए । पोखराका मेयर आचार्य निकै धेरै विदेश सयर गर्ने गर्छन् । कतिपयले उनको विदेश यात्रा अस्वभाविक भएको भन्दै विरोध पनि जनाइरहेका छन् । आचार्यले चाहिँ विदेश जाँदा महानगरको खर्च नगरेको र व्यक्तिगत खर्चमा गएको दावी गरिरहेका छन् ।