पोखरा । पोखरा वृद्धाश्रमद्वारा सञ्चालित ‘ऋषिलीला ज्येष्ठ नागरिक पत्रकारिता पुरस्कार–२०८१ बाट रासस गण्डकी प्रदेश प्रमुख वासुदेव पौडेल पुरस्कृत भएका छन् । अन्तर्राष्ट्रिय ज्येष्ठ नागरिक दिवस अवसरमा मंगलबार आयोजित समारोहमा गण्डकीका सामाजिक विकास, युवा तथा खेलकुदमन्त्री विन्दुकुमार थापाले उनलाई ५० हजार र सम्मानपत्रसहित पुरस्कृत गरे ।

पत्रकारिता माध्यमबाट ज्येष्ठ नागरिकका क्षेत्रमा पुर्‍याएको योगदानको कदर गर्दै उनलाई पुरस्कृत गरिएको वृद्धाश्रम अध्यक्ष कुशुमकेशव पराजुलीले बताए ।

पोखराका शैक्षिक एवं सामाजिक क्षेत्रमा विशिष्ठ योगदान पुर्‍याएका प्रजातन्त्र सेनानी एवं पोखरा वृद्धाश्रमका संस्थापक अध्यक्ष ऋषिकेशव पराजुली र उनका धर्मपत्नी लीलादेवी पराजुलीको स्मृतिमा छोरा कुसुमकेशवले पत्रकारिता पुरस्कार स्थापना गरेका हुन् ।

मन्त्री थापाले प्रदेश सरकार ज्येष्ठ नागरिकका हकअधिकार संरक्षणका लागि प्रतिवद्ध रहेको बताए । उनले ज्येष्ठ नागरिक भगवान्का प्रतीक रहेकाले सधैँ आदर र सम्मान गर्नुपर्ने बताए ।

गण्डकी प्रदेश सभा सदस्य भीम कार्कीले ज्येष्ठ नागरिकका पक्षमा कानुनी प्रबन्ध गर्न र अधिकारका लागि आफू प्रतिवद्ध रहेको बताए ।

पुरस्कृत व्यक्तित्व पौडेलले सम्मानले आफ्नो पत्रकारिता कर्ममा ऊर्जा थपेको बताए । उनले ज्येष्ठ नागरिकका पक्षमा बनेका कानून कार्यान्वयन हुन नसकेकामा चिन्ता व्यक्त गरे ।
कार्यक्रममा गण्डकी प्रदेशका प्रेस रजिष्ट्रार विमला भण्डारी, नेपाल पत्रकार महासंघ कास्कीका कावा अध्यक्ष रामप्रसाद तिमिल्सिनालगायतले बोलेका थिए ।