पोखरा । नेपाल सरकारले बाढी, पहिरो र डुवानका कारण भएको धनजनको क्षतिप्रति दुःख व्यक्त गर्दै ३ दिन राष्ट्रिय शोक घोषणा गरेको छ ।

प्रधानमन्त्री केपी शर्मा ओली अमेरिकाबाट फर्केलगत्तै सरकारी निवास बालुवाटारमा बसेको मन्त्रिपरिषद् बैठकले मंगलबारदेखि ३ दिनसम्म राष्ट्रिय शोक घोषणा गर्ने निर्णय गरेको हो ।

सरकारका प्रवक्ता सञ्चार तथा सूचना प्रविधिमन्त्री पृथ्वी सुब्बा गुरुङका राष्ट्रिय शोकको समयमा सरकारी कार्यालयहरुको झण्डा आधा झुकाइनेछ तर सार्वजनिक बिदा हुने छैन ।

यस्तै, बैठकले मन्त्रीहरूको एक महिनाको पारिश्रमिक सहयोग गर्नुका साथै विपद् कोषमा एक अर्ब रूपैयाँ निकासा गर्ने निर्णयसमेत गरेको मन्त्री गुरुङले बताए । बाढीपहिरोबाट विस्थापितहरूलाई स्थानीय तहको समन्वयमा पुनःस्र्थापनाको व्यवस्था मिलाउनुका साथै घाइतेहरूको निःशुल्क उपचार गर्ने निर्णय मन्त्रिपरिषद् बैठकले गरेको छ ।