पोखरा । गोरखाको लापुबेँसीबाट काठमाडौँ जाँदा सम्पर्कविहीन भएको बस धादिङको झ्याप्लेखोलामा पुरिएको अवस्थामा भेटिएको छ । लापुबेँसीबाट शुक्रबार बिहान छुटेको ना ४ ख २२७० नम्बरको बस बेपत्ता भएको थियो । आइतबार सडक पन्छाउने क्रममा गाडीको अवशेष फेला परेको हो । उक्त बसमा ५ जना सवार रहेको बताइएको छ । बस खोतल्ने क्रममा पाँचै जनाको शव भेटिएको प्रहरीले जनाएको छ ।

चालक दलका तीन र दुई यात्रुको शव भेटिएको गोरखा दरौँदी यातायात सेवा प्रालिका अञ्जन खत्रीले जानकारी दिए । तिमध्ये ३ जनाको पहिचान खुलेको छ ।

बसका धनी तथा चालक भिमसेन थापा गाउँपालिका ४ धावाका मदन परियार, धावाकै विनय भट्टराई र फुजेलका नवराज तिवारीको शव फेला परेको खत्रीले बताए । यात्रुमध्ये एकजना गोरखाकै धार्चे गाउँपालिका ७ खानीगाउँका २७ वर्षीय सुकबहादुर गुरुङ छन् भने अर्का यात्रु उनकै सम्पर्कमा मुग्लीनबाट बसमा चढेका थिए । उनको पहिचान खुलेको छैन । गत शुक्रबार धार्चे ७ लापुवेशीबाट काठमाडौँका लागि छुटेको बस आइतबारसम्म सम्पर्कबिहिन बनेको हो । लामो समयसम्म सुकबहादुर सम्पर्कमा नआएपछि उनका आफन्तले बस खोजिदिन प्रहरीलाई आग्रह गरेका थिए ।

अन्ततः झ्याप्लेखोलामा पहिरो पन्छाउने क्रममा उक्त बस पुरिएको अवस्थामा भेटिएको हो । बसको केही भाग देखिएपछि एक्साभेटरको सहायताले खोतल्न थालिएको थियो । गोरखाका डीएसपी रमेश कुमार श्रेष्ठले बस र बसभित्र ५ जनाको शव फेला परेको जानकारी दिए । उनीहरुको थप पहिचानका लागि टिचिङ अस्पताल पठाइएको छ । बसमा अरु यात्रु भए नभएको खुलेको छैन ।