पोखरा । बिहीबारदेखिको अविरल वर्षाका कारण मृत्यु हुनेको संख्या १४८ पुगेको छ । प्रहरी प्रधान कार्यालयले दिएको जानकारी अनुसार धादिङको धुनिबेसी नगरपालिका ९ स्थित झ्याप्ले खोलामा मात्रै ३५ जनाको मृत्यु भएको छ । काठमाडौँ, ललितपुर र भक्तपुरमा थप ४८ जनाको मृत्यु भएको छ । बाढी र पहिरोका कारण अझै ५५ जना हराइरहेका छन् । उनीहरुको खोजी भैरहेको प्रहरीले जनाएको छ । १०१ जना भन्दा बढी घाइते भएका छन् भने उनीहरुको विभिन्न अस्पतालमा उपचार भैरहेको छ । प्रहरी र स्थानीयहरुको सहयोगमा बाढी–पहिरोमा फसेका ३ हजार ६ सय जना भन्दा बढीको उद्धार भएको छ ।

४ सय घरमा क्षति
वर्षाले देशैभर ४ सय भन्दा बढी घरमा आंशिकदेखि पूर्ण क्षति भएको छ । अधिकांश राजमार्ग अवरुद्ध बनेका छन् । राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार साना ठुला गरेर कम्तीमा २५ वटा पुल पूरै बनाउनुपर्ने गरी भत्किएको छ । ५० हाराहारीमा क्षति पुगेको छ । सडक तथा पुलहरूमा मात्रै २ अर्ब ५० करोड क्षति पुगेको प्राधिकरणको प्रारम्भिक आँकलन छ ।

१ खर्ब क्षति अनुमान
बाढीका कारण बर्सेनि औसतमा १ अर्ब ८५ करोड रुपैयाँभन्दा बढीको क्षति हुने गरेको प्राधिकरणको तथ्यांक छ । यस्तै, १६ वटा जलविद्युत् आयोजनामा आंशिकदेखि पूर्ण क्षति भएको छ । निजी क्षेत्रका जलविद्युत् आयोजनामा मात्रै करिब २ अर्बभन्दा बढीको क्षति पुगेको अनुमान छ । प्राधिकरणका प्रवक्ता डा. डिजन भट्टराईका अनुसार निजी सम्पत्ति, सार्वजनिक स्थान, पुनर्निर्माणमा लाग्ने खर्च सबै जोड्दा करिब १ खर्ब हाराहारी पुग्ने अनुमान छ ।