स्याङ्जा । स्वास्थ्य सेवा प्रवाहमा जिल्ला अस्पताल स्याङ्जा, स्वास्थ्य कार्यालय स्याङ्जा र पुतलीबजार नगरपालिकाको नतिजा सुखद देखिएको छ । गण्डकी प्रादेशमै स्याङ्जा जिल्ला अस्पताल, स्वास्थ्य कार्यालयको प्रथम स्थान छ भने पुतलीबजार नगरपालिका तेस्रो स्थानमा रही सम्मानित भयो ।

विभिन्न ३१ स्वास्थ्य सूचक आधारमा चालु आर्थिक वर्षको प्रदेशस्तरीय समिक्षा गोष्ठीमा आयोजित सभामा स्वास्थ्य निर्देशनालयले स्याङ्जाका जिल्ला अस्पताल, स्वास्थ्य र पुतलीबजार नगरपालिकालाई सम्मान गरिएको हो ।

स्वास्थ्य सेवा प्रवाहका ३१ सूचक आधार मान्दै गण्डकी प्रदेशका स्वास्थ्य मन्त्री कृष्णप्रसाद पाठक, महानिर्देशक खिमबहादुर खड्का र सचिव डा. विनोदबिन्दु शर्माले नगरप्रमुख रेग्मीलाई सम्मानपत्रसहित सम्मान गरेका हुन् ।

स्वास्थ्य सूचकअन्तर्गत स्वास्थ्य सेवा प्रवाहमा नागरिकका पहुँच लगायत स्वास्थ्य शिविर, परिवार नियोजन, खोप कार्यक्रम, पोषण कार्यक्रम, आधारभूत स्वास्थ्य सेवा प्रवाहलगायत स्वास्थ्य प्रवाहसम्बन्धी थिए ।

ती आधारमा प्रदेशअन्तर्गत ११ जिल्लाका अस्पतालमध्ये स्याङ्जाले ९२ दशमलब २ प्रतिशत अंक छ । स्वास्थ्य कार्यालय स्याङ्जा प्रदेशका अन्य स्वास्थ्य कार्यालयमध्ये ८३ दशमलब २ अंक छ । यसैगरी, प्रदेशका ८५ पालिकामध्ये पुतलीबजार नगरपालिकाले ८२ दशमलब ३ प्रतिशत अंक प्राप्त गर्दै तेस्रो भएको निर्देशनालयले जनाएको छ ।