पोखरा । नेपालमा पछिल्लो ३ दिनयता लगातार परेको भारी वर्षाले ठूलो धनजनको क्षति हुन पुगेको छ । अकल्पनीय भारी वर्षाका कारण आएको बाढी, पहिरो र डुबानबाट शनिबार रातिसम्म ८७ जनाको ज्यान गइसकेको छ । सबैभन्दा बढी काठमाडौं उपत्यकामा धनजनको क्षति भएको छ । दोस्रोमा काभ्रेपलाञ्चोकमा क्षति भएको छ ।

सशस्त्र प्रहरी बल (एपिएफ) नेपालका केन्द्रीय प्रवक्ता सशस्त्र प्रहरी नायब महानिरीक्षक कुमार न्यौपानेका अनुसार ८७ जनाको मृत्यु पुष्टि गर्दै अरु ७२ जना बेपत्ता रहेको जनाए । यस्तै, ३६ जना घाइते भएका छन् ।

न्यौपानेका अनुसार काठमाडौैं उपत्यकामा मात्रै ४८ जनाको मृत्यु भएको छ । काठमाडौंमा २५, भक्तपुरमा ५ र ललितपुरमा १८ जनाको मृत्यु भएको छ ।

यस्तै, कोशी प्रदेशमा १० र बागमती प्रदेशमा २९ जनाको मृत्यु भएको हो । बेपत्ता हुनेमा कोशीमा ९, मधेश प्रदेशमा १, काठमाडौं उपत्यकामा २१, बागमतीमा ३९ र लुम्बिनी प्रदेशमा २ जना बेपत्ता छन् ।

उपत्यकापछि सबैभन्दा बढी काभ्रेमा १४ जनाको मृत्यु भएको छ । यस्तै, मकवानपुरमा ७, पाँचथरमा ५, सिन्धुपाल्चोकमा ४, दोलखामा ३ जनासहित विभिन्न जिल्लामा गरी कुल ८७ जनाको मृत्यु भएको हो ।

काठमाडौं उपत्यकापछि सबैभन्दा बढी काभ्रेमा २६ जना बेपत्ता छन् । पाँचथरमा ५, झापामा ४, सिन्धुपाल्चोकमा ४ सहित अन्य जिल्लामा गरेर ७२ जना बेपत्ता भएका छन् ।

काठमाडौं उपत्यकामा बागमती, नख्खुलगायत सबै नदीमा भीषण बाढी आएको थियो । बाढीले करिडोर सडकमात्र नभई आसपासका संरचनामासमेत क्षति पु¥याएको छ । काठमाडौं उपत्यकामा शनिबार भएको वर्षाले यसअघिका वर्षाको रेकर्ड नै तोडेको छ ।